АНУ-ын Ерөнхийлөгч Дональд Трамп, Украины удирдагч Владимир Зеленский нарын уулзалт Флорида муж улс дахь Мар-а-Лаго ордонд бодитой ахиц дэвшилгүй гарсангүй өндөрлөлөө.  Палм-Бичид ням гарагт болсон удирдагчдын хэлэлцээ 2 цаг 30 минут гаруй үргэлжилсэн байна. Оны эхнээс хойш хоёр удирдагч дөрөв дэх удаагаа уулзсан нь энэ юм.

Хамтарсан хэвлэлийн хурлын үеэр энхийн хэлэлцээр хэзээ байгуулагдаж магадгүй талаар асуухад Д.Трамп “Хэрэв бүх зүйл үнэхээр сайн явбал магадгүй хэдэн долоо хоногийн дараа. Харин байдал дордвол илүү удаан үргэлжилнэ. Хэрэв бүр дордвол огт бүтэхгүй ч байж мэднэ” гэж хэлжээ.

АНУ-ын удирдагч Украин дахь байлдааны ажиллагааг "Дэлхийн II дайнаас хойших хамгийн олон хүний амь хохироосон, магадгүй хамгийн том мөргөлдөөн" гэж нэрлэв.

Зеленский: Аюулгүй байдлын баталгааг 100 хувь тохиролцсон

Украины Ерөнхийлөгч Владимир Зеленский 20 заалт бүхий энхийн төлөвлөгөөний 90 хувийг, АНУ-Украины аюулгүй байдлын баталгааг 100 хувь тохиролцсон гэдэгт итгэлтэй байгаагаа илэрхийлэв. Мөн АНУ-Европ-Украины аюулгүй байдлын баталгааг үндсэндээ бүрэн боловсруулсан гэж Украины төрийн тэргүүн нэмж хэллээ.

Трампын хэлснээр, Украины аюулгүй байдлыг хангахтай холбоотой үүрэг хариуцлагын ихэнхийг Европын орнууд хүлээх боловч АНУ энэ асуудалд дэмжлэг үзүүлэхэд бэлэн байна.

Харин Зеленскийн хэлснээр, маргаантай асуудлуудыг эцэслэхийн тулд хоёр улсын төлөөлөгчид ойрын долоо хоногт уулзана. Тэрбээр мөн Европын удирдагчид болон Украины төлөөлөгчид нэгдүгээр сард Вашингтонд очиж магадгүйг дурдлаа.

Трамп: Донбассын газар нутгийн асуудал хараахан шийдэгдээгүй

Донбассын нутаг дэвсгэртэй холбоотой асуудлаар талууд одоогоор нэгдсэн байр сууринд хүрч чадаагүй байна. Украин, Оросын талууд энэхүү бүс нутгийн статустай холбоотой асуудлыг зохицуулахад “ойртож” байгаа боловч шийдэхэд хүнд хэвээр байгааг Цагаан ордны тэргүүн дурджээ. “Энэ асуудал хараахан шийдэгдээгүй ч бид шийдэлд хүрэхэд нэлээд ойртсон. Маш төвөгтэй асуудал боловч эцсийн эцэст шийдэгдэнэ гэж бодож байна” хэмээн АНУ-ын төрийн тэргүүн онцоллоо.

Харин Зеленский Трампын энхийн төлөвлөгөөний зарим заалтаар бүх нийтийн санал асуулга явуулах боломжийг үгүйсгэсэнгүй.

АНУ-ын Ерөнхийлөгч ЗАЦС-ийн статусыг Путинтэй хэлэлцжээ

АНУ-ын удирдагч Запорожийн атомын цахилгаан станцын /ЗАЦС/ талаар ярихдаа, уг станцын статусыг ОХУ-ын Ерөнхийлөгч Владимир Путинтэй утсаар ярилцах үеэр хэлэлцсэн бөгөөд Путин түүнийг “нээх асуудлаар Украинтай хамтран ажиллаж байна” гэж мэдэгдсэн гэв. Трамп мөн Оросын төрийн тэргүүн станц руу пуужин чиглүүлээгүй гэж мэдэгдсэнийг дурдлаа. Харин Зеленский энэ асуудлаар тайлбар хийгээгүй байна.

Цагаан ордны тэргүүн: Москва Украиныг сэргээн босгоход туслахаар төлөвлөж байна

Трампын хэлснээр, Москва Украиныг сэргээн босгоход дэмжлэг үзүүлэхээр төлөвлөж байгаа аж. “Орос улс Украиныг амжилттай байгаасай гэж хүсэж байна” хэмээн АНУ-ын Ерөнхийлөгч хэлээд, Путин “цахилгаан эрчим хүчийг маш хямд үнээр нийлүүлэхэд бэлэн” байгааг нэмж дурдлаа.

Европын удирдагчидтай болон Путинтэй хийсэн яриа хэлэлцээ

АНУ, Украины Ерөнхийлөгч нар хэлэлцээгээ эхлүүлэхийн өмнө Европын удирдагчидтай утсаар ярьжээ. Трамп мөн Зеленскийтэй уулзахаасаа өмнө ОХУ-ын Ерөнхийлөгч Владимир Путинтэй утсаар ярилцсан байна. ОХУ-ын Ерөнхийлөгчийн туслах Юрий Ушаковын мэдээлснээр, хоёр удирдагч Трампын санаачилгаар утсаар ярьсан нь 1 цаг 15 минут үргэлжилжээ.

Путин цаашид Анкорижийн дээд хэмжээний уулзалтаар хүрсэн үр дүнг баримжаа болгон ажиллахын чухлыг онцолсон гэж Ушаков үргэлжлүүлэн хэлэв. Түүний хэлснээр, Оросын Ерөнхийлөгч мөн тусгайлан байгуулсан ажлын хэсгүүдийн хүрээнд зохицуулалтыг үргэлжлүүлэх тухай Трампын саналыг дэмжсэн бөгөөд эдгээр ажлын хэсгүүдийн бүтэц зохион байгуулалт нэгдүгээр сарын эхээр тодорхой болно гэжээ.