Эрүүгийн цагдаагийн албанаас Нийслэлийн Соёл урлагийн газрын хэлтсийн дарга асан Э.Цэнд-Аюуш болон "Монголын соёлын аялал жуулчлалын холбоо" ТББ-ын тэргүүн Э.Эрхэмбаяр нарын бүлэг хүмүүсийг МҮОНРТ-ийн бэлтгэсэн контентыг өөрсдөө хийж гүйцэтгэсэн мэтээр хуурамч тайлан гаргаж, залилан мэхлэх замаар мөнгө угаасан байж болзошгүй хэргээр шалгаж эхэлжээ. Тэднийг хойшлуулшгүй ажиллагаа явуулж, 48 цагийн хугацаатай баривчилсан байна.

Тодруулбал, Нийслэлийн Соёл урлагийн газрын хэлтсийн даргаар ажиллаж байсан Э. Цэнд-Аюуш нь нэр бүхий гурван этгээдтэй үгсэн хуйвалдах замаар 2020 оны есдүгээр сард Нийслэлийн соёл урлагийн газраас зарласан "Соёлын биет бус өвийг өвлөн уламжлах аргачлалыг контент болгон бэлтгэн түгээх"  тендерт "Монголын соёлын аялал жуулчлалын холбоо" ТББ-ыг хуурамч баримт бичиг бүрдүүлэн шалгаруулсан байна.

Ингэхдээ Монголын Үндэсний Олон Нийтийн Радио Телевиз /МҮОНРТ/-ийн 500 орчим сая төгрөгийн төсвөөр хийсэн түүхэн баримтат кино контентыг 600 орчим сая төгрөгөөр үнэлэн өөрсдөө хийж гүйцэтгэсэн мэтээр хуурамч тайлан гаргаж, Нийслэлийн соёл урлагийн газраас их хэмжээний мөнгө "Монголын соёлын аялал жуулчлалын холбоо" ТББ-ын дансанд авчээ.

Улсын бүртгэлийн мэдээллээс үзэхэд, тус төрийн бус байгууллагыг 2018 оны арваннэгдүгээр сарын 11-ний өдөр байгуулж, Э.Эрхэмбаяр удирдлага /тэргүүн/-аар бүртгүүлжээ.

Эх сурвалжийн мэдээллээр, Э.Цэнд-Аюуш, Э.Эрхэмбаяр нар нь хамтран үүсгэн байгуулж байсан гэдэг мэдээлэл байгаа юм.