126 гишүүнтэй гэх гоёхон тодотголтой парламентад маань эгүүлэн татагдах болзлоо хангасан гишүүн цөөнгүй бий. Эрх мэдэл, албан тушаалын ардтай эрх мэдлээ урвуулан ашиглах, хууль бусаар хөрөнгөжих, бусдад давуу эрх олгох гэм зэм нуугддаг. Угтаа УИХ-ын гишүүд маань, “Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрт ёс, түүх соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж авлига ашиг сонирхлоос ангид байж, гишүүний үүргээ чин шударгаар биелүүлэхээ тангараглая. Миний бие энэхүү тангарагаасаа няцвал хуулийн хариуцлага хүлээнэ” хэмээн төрийн сүлдэнд тангараг өргөсөн. УИХ-ын гишүүний тангаргийн үгэнд "...авлига, ашиг сонирхлын зөрчлөөс ангид байж..." гэх нэмэлтийг АТГ-ын дарга З.Дашдаваагийн саналаар тусгагдсан гэдэг шиг санагдаж байна.

Гэтэл өнөөдрийн байдлаар нэр бүхий гишүүд УИХ-ын гишүүнээс эгүүлэн татагдах болзол, нөхцөлийг давуулан биелүүлчихсэн хэрнээ таг чиг сандалдаа тухлан өрөөндөө бүгсээр...

Тэд  Ерөнхийлөгч У.Хүрэлсүх УИХ-ын анхдугаар чуулганыг нээх үедээ сануулсан, ”Ард түмнийхээ халуун итгэл, их хүлээлт дунд парламентын гишүүнээр сонгогдсон та бүхэн хүний ёсыг огоорон, ёс зүйн алдаа гаргаж, өргөсөн тангаргаас няцвал ард түмнээс уучлал гуйн, нэн даруй өөрийн хүсэлтээр УИХ-ын гишүүнээс чөлөөлөгдөх ёстой. Төрийн сүлд, ард түмэндээ өргөсөн тангаргаа зөрчсөн хэн ч ард түмний төлөөлөл болж, энэхүү эрхэм хүндтэй танхимд суух учиргүй шүү” гэж хэлснийг аль хэдийнэ хоолтойгоо холиод идчихсэн байх шиг байгаа учраас улиглан, гоншигнон сануулах нь зүйтэй байх. Сануулгыг хүргэх гишүүдийн нэрс болон холбогдсон “асуудал”-ыг дор товчлон хавсаргав.

Н.АЛТАНХУЯГ АЛБАН ТУШААЛАА УРВУУЛАН АШИГЛАСАН

Улсын дээд шүүхээс Хөгжлийн банкны гэх тодотголтой хэргийг хэлэлцээд Ерөнхий сайд асан Н.Алтанхуягийг албан тушаалын байдлаа урвуулан ашиглаж “Говийн зам” ХХК-ийн барьсан замыг Хөгжлийн банкны санхүүжилтээр төрд худалдаж авсан, “Бэрэн” ХХК-д 2014 онд Хөгжлийн банкнаас зээл олгосон гэх хэргүүдийг анхан болон давж заалдах шатны шүүхээс хэрэгсэхгүй болгосон дүгнэлт нь хэргийн бодит байдалтай нийцээгүй, хэрэгт ач холбогдол бүхий нөхцөл байдлыг анхаарч үзэлгүй орхигдуулсан байна гэж үзэж, прокурорын эсэргүүцлээс зарим хэсгийг хангаж гэм буруутай эсэхийг дахин хэлэлцүүлэх нь зүйтэй гэж шийдвэрлэсэн. Өөрөөр хэлбэл шалгагдаж байгаа гэсэн үг.

Б.НАЙДАЛАА БУСДАД ДАВУУ БАЙДАЛ ОЛГОСОН

Мөн л Хөгжлийн банкны хэрэгт нэр холбогдож, яллагдагчаар татагдсан 80 хүний нэг нь УИХ-ын гишүүн Б.Найдалаа. Мань эр Хөгжлийн банкны ТУЗ-ийн хараат бус гишүүнээр ажиллаж байхдаа эрх мэдэл, албан тушаалаа ашиглаж улсад 44.3 тэрбум төгрөгийн хохирол учруулсан хэрэгт яллагдагчаар татагдсан. Тодруулбал, “Бэрэн групп” ХХК-д 22.7 сая хүртэлх ам.долларын зээл олгохыг дэмжсэн санал өгч, 2014 оны хоёрдугаар сарын 11-ний өдрийн 08 дугаартай “Бэрэн групп” ХХК-д зээл олгох тухай” тогтоол гаргасан. Улсын дээд шүүхээс Хөгжлийн банкны ТУЗ-ийн дарга, гишүүдэд холбогдох хэргийг анхан шатны шүүх хэрэгсэхгүй болгон, цагаатгаж шийдвэрлэхдээ дүгнэлтэд ач холбогдол бүхий нөхцөл байдлыг анхаарч үзээгүй, цагаатгасан үндэслэл нь хэргийн жинхэнэ байдалд нийцээгүй байна гэж дүгнэсэн.

С.ГАНБААТАР ЭРХ МЭДЛЭЭ УРВУУЛАН АШИГЛАСАН

Авлигатай тэмцэх газраас “УИХ-ын гишүүн С.Ганбаатар болон МҮЭХ-ны албан тушаалтнуудтай холбоотой 15 гомдол мэдээлэл 2020 оноос хойш ирсэн. Үүнээс 11-т нь хэрэг бүртгэл нээж, дөрвөн хэргийг нь одоо мөрдөн шалгаж байгаа” гэж мэдээлсэн. Түүнчлэн тус газраас УИХ-ын гишүүн С.Ганбаатарт холбогдох хэргийг шалгаж дуусаад, 2025 оны наймдугаар сарын 9-нд шүүхэд шилжүүлэх саналтайгаар прокурорт хүргүүлсэн. Товчхондоо МҮЭХ-ны ерөнхийлөгчөөр ажиллаж байх үедээ дээрх гэмт хэргүүдийг үйлдсэн байж болзошгүй гэж үзэж байгаа юм билээ. УИХ-ын гишүүн С.Ганбаатарыг МҮЭХ-ны газрыг бусдад худалдаж, хууль бусаар шилжүүлсэн гэх хэрэгт шалгаж байгаа гэсэн үг.

Э.БОЛОРМАА ХУУЛЬ БУС ХАНДИВ АВСАН

УИХ-ын сонгуулийн үеэр оффшор бүс дэх гадаадын компаниас хандив авсан байж болзошгүй гэх хэрэгт холбогдоод буй УИХ-ын гишүүн Э.Болормаад холбогдох хэргийг прокурорт шилжүүлжээ. Прокуророос тус хэрэгт харьяалал тогтоож, үргэлжлүүлэн шалгах эсэхийг шийдвэрлэх юм.  Өөрөөр хэлбэл, Монгол Улсын Их хурлын Сонгуулийн тухай хуулийн 56.1.1 дэх хэсэгт "гадаадын хөрөнгө оруулалттай байгууллага хандив өгөхийг хориглоно” гэж заасныг зөрчсөн гэсэн үг. Тэрбээр оффшор бүсэд бүртгэлтэй, гадаадын хөрөнгө оруулалттай компаниас 30 сая төгрөгийн хандив авсан ч хууль бус гэдгийг нь мэдээд буцаасан хэмээн ам алдсан удаатай.

Х.БАТТУЛГА АЛБАН ТУШААЛАА УРВУУЛАН АШИГЛАСАН

Авлигатай тэмцэх газраас Төгрөг нуурын ордтой холбоотой хэргийг мөрдөн шалгаж дуусаагүй гэдэг мэдээллийг өгсөн. Уг хэргийг шуурхай шалгахаар 2025 оны дөрөвдүгээр сард хуулийн байгууллагын хамтарсан ажлын хэсэг байгуулагдсан ч хэргийг шалгаж дуусаагүй л байгаа. Экс ерөнхийлөгч маань  "Эрх мэдэл, албан тушаалын байдлаа урвуулан ашиглан байж болзошгүй", "Үндэслэлгүй хөрөнгөжсөн байж болзошгүй" гэх асуудлаар шалгагдаж байгаа гэсэн үг л дээ. ЗГХЭГ-ын дарга асан Н.Учралын мэдээлснээр манай экс Ерөнхийлөгч 39 стратегийн ордод хамаардаг Төгрөг нуурын ордыг үндэстэн дамнасан санхүүгийн схем хийж 250 сая ам.доллараар зарсан. Бүр тодруулбал, Виржини арал, Сингапур, Хонконгод бүртгэлтэй компаниудаар дамжуулж, үндэстэн дамнасан санхүүгийн схем хийсэн гэх. Хэдийгээр Ерөнхий сайд Г.Занданшатар 2025 оны есөн сард "Төгрөг нуурын орд газрыг Үндэсний баялгийн санд шилжүүлсэн гэх мэдэгдэл бий ч хэрэг хуучирдаггүй гэж үг бас бий.

Х.БУЛГАНТУЯА ҮНДСЭН ХУУЛЬ ЗӨРЧСӨН

Үндсэн хуулийн цэцийн Их суудлын хуралдаанаар "Засгийн газрыг огцруулсан УИХ-ын тогтоол Үндсэн хууль зөрчсөн гэж дүгнэсэн". Тодруулбал, Улсын Их Хурлын тухай хуулийн 9.3 дугаар зүйлд “Хэрвээ Үндсэн хуулийн цэц УИХ-ын гишүүн тангарагаасаа няцаж, Үндсэн хууль зөрчсөн гэсэн дүгнэлт гаргасан бол Улсын Их Хурал энэ дүгнэлтийг хүлээн зөвшөөрөх ёстой бөгөөд түүнийг эгүүлэн татах эсэх асуудлыг хэлэлцэн шийдвэрлэнэ” гэж заасан байдаг билээ.