Улсын бүртгэлийн ерөнхий газраас Иргэний шилжилт хөдөлгөөний бүртгэлийг цахимаар бүртгэх үйлчилгээг Төрийн цахим үйлчилгээний нэгдсэн систем /e-mongolia.mn/-д нэвтрүүлж байгаатай холбоотойгоор сэтгүүлчдэд мэдээлэл /2022.06.16/ өглөө.

Цахим орчинд тоон гарын үсгээ таниулаад орж байгаа иргэд энэ үйлчилгээг авах боломжтой.

УБЕГ-ын дарга Д.Дэлгэрсайхан “Өнгөрсөн хугацаанд шилжилт хөдөлгөөн нэг газраасаа хасалт хийлгээд, нөгөө газраа бүртгүүлдэг байдлаар зохицуулалт хийгддэг байсан. Харин одоо бид зөвхөн нэг талдаа бүртгүүлэх буюу шилжиж очиж байгаа талдаа бүртгэлээ хийлгэдэг зохицуулалттай явж байна. Гэхдээ асуудлууд гарсаарбайна. Энэ нь анхан шатны нэгжүүд дээрх ачаалал эрс ялгаатай байдлаас үүдэлтэй. Зарим газар маш их ачаалал үүсч байдаг. Тиймээс бид шилжилт хөдөлгөөнийг зайлшгүй цахимаар явуулах шаардлагатай юм байна гэж үзээд, өнөөдөр буюу 2022 оны зургаадугаар сарын 16-ны өдрөөс эхлээд, e-mongolia цахим системд оруулж байна. Ингэснээр нэгдүгээрт, цахим орчинд тоон гарын үсгээ таниулаад орж байгаа иргэд энэ үйлчилгээг авах боломж бүрдэж байгаа. Хоёрдугаарт, төр өөрт байгаа мэдээллээ иргэдээс давхар шаарддаг байдал арилна. Тухайлбал, оршин суугаа хаягийн тодорхойлолт шаардахаа больж, цахим системд ийм хүсэлт орж ирэхэд бүртгэлийн ажилтан системээс шалгаж, хариу өгдөг болно. Гуравдугаарт, иргэд ямар нэгэн зардал, чирэгдэлгүйгээр шилжилт хөдөлгөөний үйлчилгээг авах боломж бүрдэж байгаа юм” гэв.

Мөн тэрбээр 2022 оны зургаадугаар сардаа багтаан, тоон гарын үсгийг гар утасны аппликейшн ашиглаж, авах боломжийг бүрдүүлнэ гэх мэдээллийг өгсөн юм. Ингэснээр иргэд ямар нэгэн хүндрэл, чирэгдэлгүйгээр гар утасны аппликейшн дээрх болон иргэний үнэмлэх дээрх тоон гарын үсгээ ашиглаж, амар хялбараар энэ үйлчилгээг авах боломжтой болох нь ээ.