Хонконгийн түүхэнд гарч байгаагүй аймшигт гал түймрийн улмаас 128 хүн амиа алдаж, 200 орчим хүн сураггүй болсон тухай тус хотын Аюулгүй байдлын албаны нарийн бичгийн дарга Крис Тан Пин Кынг мэдэгдлээ. Гамшигт өртсөн хүмүүсийн дурсгалыг хүндэтгэн төрийн бүх байгууллагын байран дахь төрийн ба Хонконгийн далбаануудыг даваа гараг хүртэл бөхийлгөж, аливаа ёслол, олон нийтийн арга хэмжээнүүдийг цуцалж, хойшлуулжээ. Хотын 18 дүүрэгт байрлуулсан эмгэнэлийн номуудад хонконгчууд 9:00-ээс 21:00 цаг хүртэл гашуудлын үгээ бичиж байна.

Гал түймэр Тай По дүүрэг дэх долоон өндөр байшинг хамарсан бөгөөд гал сөнөөгчид галыг унтраахын тулд 43 цагийн турш ажиллажээ. Эдгээр байшинд нийт 2000 өрхийн 4 мянга гаруй хүн амьдарч байсан бөгөөд барилгын фасадыг шинэчлэхэд ашиглаж байсан хулс модон дээр тамхины иш унаснаар гал гарсан гэж урьдчилсан байдлаар дүгнэсэн байна. Амиа алдсан 39 хүний цогцсыг ар гэрийнхэнд нь таниулсан бөгөөд цогцос таниулах ажиллагаа үргэлжилж байна.

Хотын захиргаанаас түймэрт өртсөн гэр бүлүүдэд санхүүгийн тусламж үзүүлж байна. Тухайлбал, амиа алдсан иргэн бүрийн ар гэрт 200 мянган хонконг долларын /25,7 мянган ам. доллар/, түлэгдэж гэмтсэн хүн бүрт 50 мянган хонконг долларын /6,4 мянган ам.доллар/ мөнгөн тусламж олгоно. Галд өртсөн өрх бүрт нийгмийн тусгай ажилтан ажиллаж байна. Мөн талийгаачдыг чандарлах, оршуулах ажиллагааны бүх зардлыг төрөөс даана. Хотын оршин суугчид сэргээн босгох ажилд идэвхтэй тусалж байгаа бол хуулийн байгууллагууд гал гарах болсон шалтгааныг мөрдөн шалгах явцад 11 хүнийг баривчилжээ.

Бямба гаргийн өглөөний 8:00 цагт Хонконгийн засаг захиргааны тэргүүн Жон Ли Ка-Чиу сайд нарын хамт 3 минут дуугүй зогсож, амиа алдсан хүмүүсийн дурсгалыг хүндэтгэлээ.