Эрх баригч МАН-ын 31 дүгээр их хурал энэ амралтын өдрүүдэд буюу 2025.11.15-16-ны өдрүүдэд “Буянт-Ухаа” спорт цогцолборт болох товтой. 2255 төлөөлөгч оролцох МАН-ын их хурлаар намын бага хурлын бүрэлдэхүүнээ шинэчилж, намын шинэчилсэн дүрмээ ч батлах юм. Мөн намын даргаа сонгох тухайд өмнө бага хурлаар нэр дэвшсэн УИХ-ын дарга асан Д.Амарбаясгалан, Ерөнхий сайд Г.Занданшатар нар нэрээ татаж буйгаа мэдэгдэж, өөр хүмүүс нэр дэвших нь тодорхой болсон юм. Намын даргын сунгаанаас үүдэлтэй МАН-ын зовлон, төрийн зовлон болж, хоёр хуваагдсан МАН-ын бүлгийн гишүүд Төрийн ордонд эцсээ хүртэл хагаралдсан. УИХ-ын дарга нь парламентаа удирдан явуулах эрх зүйн чадамжгүйд хүрч, дангаараа бүрдүүлсэн Засгийн газраа ч татан буулгах дөхсөн билээ. Парламентын хямрал ч нүүрлэж болохуйц нөхцөл байдалд УИХ-ын дэд дарга Х.Булгантуяагаар удирдуулсан УИХ-ын чуулган нэг хэсэг үргэлжилсэн. Гэвч чуулганаар улс орны асуудал ярихаасаа илүүтэйгээр фракциудын хэн нь амьд үлдэх вэ? гэдэг дайн өрнөсөн гэхэд болно.

     ТББХ-ны 2025.10.16-ны өдрийн хуралдаанд оролцсон Улсын Их Хурлын 22 гишүүний 19 нь Монгол Улсын Ерөнхий сайд Гомбожавын Занданшатарыг огцруулахыг дэмжээгүй. Иймд энэ талаарх Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтсон. Улмаар УИХ-ын чуулганаар Г.Занданшатарын Засгийн газрыг огцруулах асуудлыг хэлэлцэж, санал хураан УИХ-ын дэд дарга Х.Булгантуяа нь Засгийн газрыг огцруулах шийдвэр дээр алх цохисон юм. Ерөнхий сайд Г.Занданшатар Үндсэн хуулийн цэцэд хандаж УИХ-ын дэд дарга Х.Булгантуяагийн үйл ажиллагаа, Ерөнхий сайдыг огцруулах асуудлыг хэлэлцсэн аравдугаар сарын 17-ны чуулганы нэгдсэн хуралдаан болон уг хуралдаанаас гарсан Ерөнхий сайдыг огцруулах тухай Улсын Их Хурлын тогтоол нь Монгол Улсын Үндсэн хуулийн Нэгдүгээр зүйлийн 2, Дөчин гуравдугаар зүйлийн 1, Далдугаар зүйлийн 1 дэх хэсгийг зөрчсөн эсэхийг тогтоолгохоор хүсэлт гаргасан байдаг. Тэгвэл Үндсэн хуулийн Цэц 2025 оны аравдугаар сарын 22-ны өдөр Их суудлын хуралдаанаар уг асуудлыг хэлэлцээд, УИХ-ын дэд дарга Х.Булгантуяа нь Үндсэн хууль зөрчсөн гэдэг шийдвэр гаргасан юм. Эл асуудал нь "Эрүүгийн хуулийн 19.2 дугаар зүйлд заасан "Төрийн эрх мэдлийг хууль бусаар авах, саатуулах", 12-15 жилийн ялтай гэмт хэрэг юм. Уг асуудлыг Тагнуулын байгууллагаас шалгаж байгаа гэх. 

Тэгэхээр МАН-ын их хурлын дараа ҮХЦ-ийн дүгнэлтийг үндэслэн УИХ-ын дэд дарга асан Х.Булгантуяаг эгүүлэн татах асуудал яригдах нь байна.