Монгол Улсын дээд шүүх Сонгуулийн ерөнхий хороотой хамтран “Улс төрийн намын дүрмийн нэмэлт, өөрчлөлт (Шинэчилсэн найруулга)-ийг бүртгүүлэхэд анхаарах асуудал” уулзалтыг зохион байгуулж байна.  Уулзалтад Улсын дээд шүүхийн шүүгчид, Тамгын газрын Бүртгэлийн алба болон бусад холбогдох мэргэжилтнүүд, Сонгуулийн ерөнхий хорооны Улс төрийн намын мэдээлэл, арга зүйн газар, Улс төрийн намын санхүүжилт, хяналтын газрын албан хаагчид болон улс төрийн намуудын төлөөлөл оролцож байна.

Улсын дээд шүүхийн 2024 оны 02 дугаар сарын 23-ны өдрийн 06 дугаар тогтоолоор батлагдсан “Улс төрийн намын бүртгэл хөтлөх журам”-д  зааснаар Улс төрийн намын бүртгэл дараах төрөлтэй байна. Үүнд:

• шинээр үүсгэн байгуулагдсан намын бүртгэл
• өөрчлөн байгуулагдсан намын бүртгэл
• намын үйл ажиллагааг зогсоосны бүртгэл
• нам тараасны бүртгэл
• намын дүрмийн нэмэлт, өөрчлөлтийн бүртгэл
• намын даргын бүртгэл
• намыг идэвхтэйд, эсхүл идэвхгүйд тооцох бүртгэл.

Намын бүртгэлтэй холбоотой 2024-2025 онд 57 өргөдөл хүлээн авсан. Үүнээс Танхимын нийт шүүгчийн хуралдаанаас буцаасан 18, Нийт шүүгчийн хуралдаанаас бүртгэхээс татгалзсан 26, бүртгэсэн 12, ажиллагаа хийж байгаа 1 өргөдөл байна.

Шинээр нам үүсгэн байгуулагдсаныг бүртгэхээс татгалзах үндэслэл -7

1. Намын дүрэм, хөтөлбөр нь Монгол Улсын Yндсэн хууль болон бусад хуульд харшилсан
2. Монгол Улсын тусгаар тогтнол, бүрэн эрхт байдал, нутаг дэвсгэрийн бүрэн бүтэн байдал, үндэсний эв нэгдэлд ноцтой аюул учруулах үндэслэл байгаа бол
3. Yндсэн хуулийн бус аргаар төрийн эрхийг авах аливаа үйл ажиллагаа явуулах үндэслэл байгаа бол
4. Зэвсэглэх, эсхүл цэрэгжих, цэрэгжсэн бүтэцтэй болох, зорилгоо хүчирхийллийн замаар гүйцэлдүүлэх үйл ажиллагаа явуулах үндэслэл байгаа бол
5. Гишүүдийн тоо 801-ээс доош
6. Бүртгэлд орсон гишүүн нь өөр намын харьяалалтай, эсхүл өөр хүн төлөөлсөн
7. УТНтХ-ийн 6 дугаар зүйлийг зөрчин нэр хэрэглэсэн

Улс төрийн намын тухай хууль (Шинэчилсэн найруулга)-ийг дагаж мөрдөх журмын тухай хуульд зааснаар улс төрийн нам дүрэм, хөтөлбөр, дотоод зохион байгуулалтыг Улс төрийн намын тухай хууль (Шинэчилсэн найруулга)-тай нийцүүлэх арга хэмжээг 2025 оны 12 дугаар сарын 31-ний өдрийн дотор хэрэгжүүлнэ. Тус өөрчлөлтийг Улсын дээд шүүхэд 30 хоногийн дотор хүргүүлэхээр хуульчилсан байдаг.