Төр засаг үймж сөргөлдөөн нь ҮАБЗ-ийн хоёр албан тушаалыг эзэнгүйдүүлсэн өдөр хоногууд өчигдөр өндөрлөв. Өөрөөр хэлбэл ТББХ-ны дэмжээгүй саналыг дэмжье томъёоллоор санал хураасан нь Үндсэн хуульд заасан ардчилсан ёс, хууль дээдлэх зарчмыг зөрчсөн байна гэх дүгнэлтийг ҮХЦ гаргасан. ҮХЦ-ийн зүгээс “Уг маргаан нь онц хүндрэлтэй, яаралтай шийдвэрлэх асуудал байх тул хуралдаанд бэлтгэх ажиллагааг нэн даруй дуусгасан. Учир нь Ерөнхий сайд огцорсноос хойш 30 хоногийн дотор шинэ Ерөнхий сайдыг томилоогүй бол Ерөнхийлөгч УИХ-ыг тараах үр дагавартай. Маргааныг богино хугацаанд шийдвэрлэх нь УИХ тарах, улс төрийн хямрал үүсэх эрсдэлийг бууруулах үр дүнтэй гэж үзсэн” гэж мэдэгдсэн.

Товчхондоо Ерөнхий сайд Г.Занданшатарыг огцруулсан УИХ-ын 95 дугаар тогтоолыг Үндсэн хууль зөрчсөн гэж ҮХЦ-ийн Их суудлын хуралдаанаас шийдвэрлэсэн билээ.

Үнээн... Хэний талд ямар үр дүн гарахаас үл хамаарч зөвхөн Үндсэн хуулиа хатуу дагах ёстой. Тэгж байж бид Үндсэн хуулийн хямралаас сэргийлнэ гэж хэлуж байсан хуульчдын үг биеллээ оллоо. Намын хямрал төрийн хямрал, Үндсэн хуулийн хямрал болон өргөжих гамшиг намжлаа. Харин одоо нэгэнт ҮХЦ-ээс Ерөнхий сайдыг огцруулсан процесс Үндсэн хууль зөрчсөн гэж үзсэн тул Х.Булгантуяа гишүүн эгүүлэн татагдах учиртай. Энгийнчилбэл,   төрийн эрх мэдлийг хууль бусаар авсан асуудал үүснэ. Ерөнхий сайдыг огцруулах асуудалд ТББХ санал, дүгнэлтээ УИХ-ын чуулганд танилцуулсны дараа хуралдаан даргалагч “Ерөнхий сайдыг огцруулахыг дэмжье” гэсэн томьёоллоор л санал хураалт явуулчихсан бол асуудал аядуухан ном журмын дагуу өрнөчих байсан юм. Одоо Х.Булгантуяаг эгүүлэн татснаар асуудал дуусчихгүй. Нэгэнт хууль зүйн үүднээс тайлбарлавал төрийн эрхийг хууль бусаар авахыг санаархсан үйлдэл учраас хамсаатнуудыг нь хам хэрэгт татна. Товчхондоо ордны хуйвалдаан гэж үзэн нэгээр тогтохгүй гишүүнийг эгүүлэн татах асуудал хөндөгдөнө. Эгүүлэн татагдах учиртай гишүүдийг Х.Булгантуяа тэргүүлж, Ц.Сандаг-Очир , А. Ариунзаяа,  Н.Номтойбаяр, П.Сайнзориг нар дагалдана. Товчхондоо эгүүлэн татагдах болзлоо хангасан нэр бүхий гишүүдийн эгнээ нэлээн олон хүнээр өргөжлөө гэсэн үг...