“Монголросцветмет”-ийн харьяа “Шижир алт” ХХК-ийн гүйцэтгэх захирлаар ажиллаж байсан О.Баттөмөрийг АТГ-ынхан үндэслэлгүй хөрөнгөжсөн байж болзошгүй хэмээн шалгаж дуусаад хэргийг шүүхэд шилжүүлэх саналтайгаар прокурорын байгууллагад шилжүүлжээ.

Түүнийг хэд хэдэн үндэслэлээр шалгасан гэх мэдээлэл байгаа юм. 

Тухайлбал: тендер сонгон шалгаруулалтгүйгээр худалдан авалт хийсэн, үндэслэлгүйгээр хөрөнгөжсөн байж болзошгүй, мөн алт олборлох Драга-250 төхөөрөмжийг зах зээлийн үнээс хэт хямдаар зарж борлуулсан гэх зэрэг үндэслэлээр шалгасан аж.

“Шижир-Алт” ХХК-ийн байгуулагдсан түүх 1994 онд байгуулагдсан Заамарын алтны үйлдвэрээс эхтэй.

Төв аймгийн Заамар сумын нутагт байдаг энэ үйлдвэр алт олборлолтоороо хамгийн томд орох 8.6 сая долларын хөрөнгө оруулалттай орчин үеийн үйлдвэр юм. Тухайн үед “Монголросцветмет” нэгдмэл дангаараа санхүүжүүлж Заамарын алтны үйлдвэрийг барьж байгуулах боломжгүй учраас ”Монголросцветмет” нэгдэл, ОХУ-ын Зарубежцветмет нэгдэл, Эрдэнэт концернийн 51%, 25%, 24%/ “Шижир-Алт” компанийг байгуулах асуудлыг хамтарсан үйлдвэрийн зөвлөлийн хуралдаанаараа шийдвэрлэсэн байдаг. 

Заамарын алтны үйлдвэр хамгийн техник сайтай, боловсон хүчин сайтай, өндөр үр ашигтай үйлдвэр гэдгийг хүн бүхэн хэлдэг тэрээр улсын төсөвт чамгүй хөрөнгө төвлөрүүлдэг байсан ч “Гол, мөрний урсац бүрэлдэх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль” гарсантай холбоотойгоор үйл ажиллагаагаа зогсоосон байжээ.

Харин 2017 оны 5 сард “Алт-2” хөтөлбөрийн хүрээнд “Шижир-Алт” ХХК-ийн үйл ажиллагааг дахин сэргээн ажиллаж байгаа аж.

О.Баттөмөрийн хувьд УИХ-ын дарга асан М.Энхболдын хүү Анарын найз гэдгээр нь олон нийт андахгүй. Тэрбээр 2017 оны тавдугаар сарын 1-ний өдөр энэ албан тушаалд томилогдож байжээ.