Уг нь өнөөдөр монголчуудын баярын өдөр. Юу наадам, юун цагаан сар гэдэг шиг... Өдийгөөс яг 80 жилийн өмнө буюу 1945 оны 10 дугаар сарын 20-нд  бүх нийтийн санал асуулга явуулж 100 хувийн саналаар БНМАУ тусгаар тогнолоо баталгаажуулсан өдөр. Гэвч өнөөдөр яг 80 жилийн дараахи эл түүхэн өдөр монголчууд, монгол төрийн эрх баригчид баларч самарсан бантандаа хутгалдаад түүх, цадигтай манатай л өнжих шиг боллоо. Ардчилсан хувьсгалаас инагш анх удаа УИХ нь даргаа, Засгийн газрын тэргүүнээ хамтаар нь унагаж, унагасан үйл явдал нь Үндсэн хуулийн зөрчил хэмээн Засгийн газрын сайд нар нь Үндсэн хуулийн цэцэд хандаад, шийдэл нь гараагүй байхад Ерөнхийлөгч нь хориг тавиад алтан медальт гэж ард түмнээ яригддаг бантан ч цаашаа “бантан” болчихлоо.

Бантан уг нь сайн хоол. Чухам яагаад болж бүтэхгүй, эргэж хургасан ээдрээ гогцоо нь гарамгүй орооцолдсон асуудлыг бантан гэдэг ч болсон юм бүү мэд.

Бантангийн болц хэрхэн гүйцэхийг харахаас өөр замгүй бужигнаан дундуур бас нэг хачир нэмэгдсэн нь өнөөдрийн Сангийн сайд Б.Жавхлангийн мэдэгдэл. Үймээн самууны хажуугаар улсын төсвөө яах вэ гэх асуудал олон түмний онцолбол төрийн албаныхны тархи толгойн өвчин болчихоод байсан. Гэтэл Б.Жавхлан сайд маань гарч ирээд “Төсвийг батлах асуудал Монгол Улсын Их Хурлын чуулганы хуралдааны дэгийн тухай хуулийн дагуу л явна. Төсвийн хэлэлцүүлэг гуравдугаар шатандаа орчихвол цаашаа хэлэлцэхэд амархан болно. 2026 оны төсвийг эргүүлэн татна гэсэн асуудал байхгүй.

Засгийн газар төсвөө хугацаандаа өргөн барьсан одоо төсөвтэй холбоотой асуудал УИХ-ын мэдэлд байгаа. Одоо УИХ дахь ажлын хэсэг байгуулагдахыг л хүлээж байна.

Цалин, тэтгэвэртэй холбоотойгоор ажлын хэсэгт хүргэх саналаа Засгийн газар бэлдчихсэн байгаа. Төсөвт ямар нэгэн байдлаар эрсдэл үүсэхгүй. Үүрэг гүйцэтгэж байгаа Засгийн газар ажиллах ёстой зарчмаараа л ажиллана” хэмээн мэдэгдлээ. Түүнчлэн тэрбээр “Монгол Улсын зээлжих зэрэглэл нэг шат ахиж, тогтвортой гэсэн ангилал руу 12 жилийн дараа ахин шилжсэн” гэж тодотголоо.

Үгийн цаана үг гэдэг. Энэ удаагийн төсөв буюу ирэх жилийн төсвийн төсөлд иргэдээсээ санал авсан хэмээн бухах гарц бий. Иргэдийн саналыг тусгасан гэхээсээ илүүтэй, эрсдэл гарвал маниус руу бурууг чихэх гарц гэж ойлгож болно. Басхүү алдагдал, завхрал нь хээгээ барчихаад байхад омголон загнасны учир нь одоо бүр ч тодорхой болчихлоо. Тодруулбал зээлжүүлэх зэрэглэл ахисан учраас ирэх жил эдийн засаг эвгүйтэх үеэр Засгийн газар бонд гаргаад замаа засчихна. За тэгээд яваандаа өнөөхөө эгэл ардаараа төлүүлчихнэ гэсэн энгийн атлаа тов тодорхой санаа явж байгаа биз... Сангийн сайдаас салахын заяа байна уу гэж хашхирмаар ч юм шиг. Басхүү  УИХ-ын гишүүн Н.Алтанхуяг “Б.Жавхлан сайд аа, чиний үед Монголын гадаад өр зээл дампуурлаа. Монголын санхүү ч дампуурлаа” хэмээн чуулганы индэр дээрээс хэлсэн үг улам бүр баталгаажиж буйг бас сануулах ёстой байх.

З.УРСГАЛ