МАН-ынханы хөгшүүл ба залуучууд гэж хоёр талдаа гарчихаад чулуун байлдаан шиг нэг нэгэн рүүгээ жижиг, том чулуу шидэлцсэн өдрүүд дуусах болоогүй бололтой. Ингэж хэлсний учир залуучууд фракцын галзуу найзууд Л.Оюун-Эрдэнэ, Д.Амарбаясгалан хоёрын дунд яс хаясан мэдээллийг Б.Энхбаяр цахим орчинд нийтэллээ.

Монголчууд төдийгүй дэлхий дахины анхааралд өртөж чадсан "Монгол Хаан" жүжгийн эргэн тойронд худал, үнэн нь үл мэдэгдэх өчнөөн цуурхал гарч, тэр дороо мартагдсаар байв. Амраг хайртдаа дүр худалдаж авдаг гэхээс эхлээд хууль бус хөрөнгө оруулалттай гэх олны яриа ч энэ жүжгийг одоо хэр нь дагасан хэвээр.

Тэгвэл уг жүжигтэй холбоотой дахин нэг мэдээлэл ил боллоо. Тодруулбал, "Монгол Хаан" жүжиг нууцын гэрээний дор “Эрдэнэс Оюутолгой” компаниас 7 тэрбум төгрөгийн санхүүжилт авсан талаар УИХ-ын гишүүн Б.Энхбаяр баримт дэлгэлээ. 

Үүгээр ч зогсохгүй хамгийн ноцтой нь экс ерөнхий сайд Л.Оюун-Эрдэнийн журмын нөхөр Д.Амарбаясгалангаа гадны төлбөртэй сайтуудаар намнуулсан гэх агуулга бүхий мэдээлэл байлаа. Одоо нэг талд тоглож байгаа хоёр өнгөрсөнд ашиг сонирхлын зөрчилд орж байсан болж таарав. Тэгэхээр Д.Амарбаясгаланг нүүрсний хулгайч болж цоллосон хүн нь УИХ-ын гишүүн Л.Оюун-Эрдэнэ Ерөнхий сайд байхдаа гардан гүйцэтгэсэн болж таарав. Өдгөө муу, муухайгаар хараалгаж, гэмт хэрэг хүлээх нөхцлийг нь анд нөхөр нь хийснийг мэдэх нь УИХ-ын дарга Д.Амарбаясланд таатай санагдахгүй байх. Ёстой л улс төрд мөнхийн найз, дайсан гэж байдаггүй. Зөвхөн мөнхийн эрх ашиг л гэж байдаг гэдгийг утгаар нь МАН-ынхан үлгэр жишээ үлээвэр найрал хөгжим шиг олноо толилуулж байна. Дуусаж өгдөггүй Солонгос сериал шиг тэдний хоорон дахь тэмцэл хэдэн оныг туулахыг тааж, мэдэхэд хэцүүхэн болж, талцаж уралцсан МАН-ынхан тамираа барах нь ээ.

Ямартай ч МАН-ыхан нэг нам, нэг завь, анд нөхөд хамааралгүй болж, эрх мэдэл, ашиг сонирхлын төлөө улайран зодолдож байна.