Ерөнхий сайд Г.Занданшатарыг огцруулах бичигт 50 гаруй гишүүн гарын үсэг зурж, УИХ-д өргөн барьсан. Тэгвэл тус бичигт "Үндэсний эвсэл"-ийнхэн гарын үсэг зуржээ. Тэд гарын үсэг зураад зогсохгүй дараагийн Засгийн газар байгуулагдахад Засгийн газарт орж ажиллахад бэлэн гэж тус эвслийн тэргүүн Н.Номтойбаяр мэдэгдлээ. Түүнчлэн тэрбээр "Сүүлийн өдрүүдэд улстөрд үүсээд байгаа нөхцөл байдалтай холбогдуулан УИХ-д суудалтай Үндэсний эвслээс хоёр чухал УИХ-ын тогтоолын төсөлд гарын үсэг зурлаа.

Нэгд, хамгийн сүүлд би та бүхэнд мэдээлэл өгөхдөө төрийн нууцын зэрэгт авсан нүүрс худалдааны 32 гэрээний зөвхөн хавтсыг нь үзүүлээд байна. Нэг улстөрийн асуудал үүсэхэд тэр хүнд нь зориулж нэг хуудас нээгээд, үнэн худлаа нь мэдэгдэхгүй гүжигдэж, доромжилж нэр хүндийг нь гутаадаг үзэгдлүүд байна. Тэгэхээр энэ гэрээнүүдийг бүгдийг нууцаас гаргаж шалгах түр хороо байгуулъя гэдэг зарчмын асуудлыг хөндсөн. Тиймээс УИХ-ын нэр бүхий гишүүд бүрэн эрхийнхээ хүрээнд нэгдэж нүүрстэй холбоотой бүхий л асуудлыг хянан шалгах тогтоолын төсөлд манай эвслийн гишүүд гарын үсэг зурлаа.

Хоёрт, Засгийн газрыг огцруулахтай холбоотой нийтэд яригдаж байгаа мэдээллээс бусад дөрвөн зүйлийг тооцож Үндэсний эвслийн гишүүд Засгийн газрыг огцруулах нь зүйтэй гэж гарын үсэг зурсан. Намын дотоод асуудлаа улсын зовлон болгосон, бодит байдал энэ. Хуулийн байгууллагыг улс төрийн бороохой болгож ашиглаж болохгүй. Эдийн засгийн үзүүлэлтийг харвал муу нь өсөж, сайн нь буурчээ. Энэ Засгийн газрын бүрэлдэхүүн үнэхээр чадамжгүй байна. Бид орж ажиллая, нуугаад байх юм алга. Унхиагүй, асар их асуудал дагуулдаг хүмүүсийг сольж чаддаг хүмүүс нь орж ажиллая, би өөрийгөө бүрэн чадна гэж бодож байгаа. Үндэсний эвсэл дараагийн Засгийн газарт орж ажиллахын төлөө гарын үсэг зурсан” гэж хатуухан мэдэгдлээ.