МАН-ын даргыг сонгох сонгуулиас болж улс төр бужигнаж байна. МАН-ын маргаан төр, АН, ХҮН, ИЗНН-ын үйл ажиллагаанд илт нөлөөлж байна, мэдээж сөргөөр... МАН-ын залуу, болон дунд ахмад үеийнхний зодоон ил цагаандаа гарч, иргэд тэднийг илт хачирхан ажиглацгааж байна. Тэд зодооноо дотооддоо шийдэж үл чадахаа мэдрэн тоглоомдоо улс төрийн хоёр дахь том хүчин гэж хэлж болохуйц АН-ыг татан оруулахыг санаархлаа. Гэвч АН энэ удаа ноёдын зодоон маньд падгүй, бид сөрөг хүчнээ хийнэ гэдэг дээрээ бат зогсоно гэж байр сууриа илэрхийлж байх шиг байна.

Арга ч үгүй биз, 2024 оны сонгуулийн дараа хамтарсан Засгийн газар байгуулж, ажил урагшилж, амжилт дөхүүлэх боломж гэлцэж байсан ч нэг л өдөр МАН-ын Бага хурал хуралдаж манай ардчиллагчдыг хөөж гудамжинд гаргасан. Одоо дахиж хөөгдөж, туугдах хүсэл яахан төрөх...

Уг нь Засгийн газрыг унагах ажиллагаанд АН-ын гишүүд нэгдчихвэл Г.Занданшатарын толгойлж буй гүйцэтгэх засаглал унах нь цаг хугацааны л асуудал. За ямартай ч МАН-ын хоёр тал эхлээд намаа, одоо УИХ-ыг, дагуулаад хэвлэл мэдээллийнхнийг хоёр хувааж чадлаа. Сөргөлдөж байна МАН-ынхан. Өрсөлдөөн бус бүлэглэлүүдийн сөргөлдөөн. Сөргөлдөөн улс эх орны цаг минуттай өрсөн шуурхайлан хийх ажил, шийдэх шийдлийг удааж, гацааж чадаж байна. Хохирогч нь мэдээж, Монгол Улс, монгол хүн.

Улс орны эдийн засгийн түвшин ямар байдалтай, инфляц хэчнээн их өсөлттэй байгаа билээ. Иргэдийн амьдралд бүх зүйл маш хүндээр тусаж байна. Улс төрийн ууган хүчин төрийн эрх брьж буй намын хувьд авлига, ашиг сонирхлын зөрчил, нам доторх бүлэглэлийн сөргөлдөөнөө хойш тавих шаардлагатай байна. Төрийн бодлого тасралтгүй үргэлжлэх ёстой. Гэтэл МАН хоёр хуваагдаад аль аль нь олонх болж, асуудлаа шийдэж чадахгүй байна. Гэхдээ намд үүсээд буй хямралыг даван туулж л таарна. Яг өнөөдрийн тухайд бүлэглэлүүдийн сөргөлдөөнөө хойшлуулж, эсвэл эвлүүлдэгсэн үү ямар нэг гарц олж, улс эх орныхоо эрх ашгийг өмнөө тавиад явах ёстой.

З.Урсгал