Цаг төрийн үймээн гэдэгчлэн засаг төрийн үймээн болж байна, Монголд. Үймээн өвөл Л.Оюун-Эрдэнийн Засгийн газар Баялгийн сангийн хуулийг баталж Үндэсний хуримтлалын сан үүсгэхтэй холбоотойгоор стратегийн орд газрууды хувийн эзэмшлийн мэдэлд буй тодорхой хувийг авах тухай асуудлыг хөндсөн үеэс идэвхжсэн. Эхлэл бол ихээ эрт эхэлсэн. Эргэн сануулбал,  МSC-ийн санхүүжилтээс татгалзахаа илэрхийлсэн тэр үеэс эхлэлтэй.

Харин өдгөө олгой хагаравч тогоон дотроо байх ямар  хортойг нотолсон үйл явдал МАН-ын дотоодод өрнөж, савнаасаа хальж, тогоондоо багтахгүй болтлоо исэж, гашилсныг харуулж байна. Одоо юу ч зогсоож чадахгүй. Тулаан өрнөнө. Тулаанд хэн ялах нь Монголын цаашдын замналд шууд утгаараа нөлөөлнө. Хүссэн хүсээгүй МАН бол Монголын төр. Төрийн бодлогыг зангидагч гол хүчин, улс төрийн салбарын ноёлон тоглогч.

Товчхондоо Г.Занданшатар, Д.Амарбаясгалан нарын хэн нэг нь ялагдаж, нөгөө нь ялагдаж байж л дуусна. Угаас зөвлөлдөн эвлэх нь Монголд хэрэггүй. Хэрвээ Д.Амарбаясгалан ялагдвал, Г.Занданшатар Засгийн ажлаа үргэлжүүлж, МАН-ын ахмад болон дунд үеийнхэн MCS-ийнхний санхүүжилтийг авч, Ухаа худаг улсад очих боломж хаагдана гэсэн үг. Товчхондоо, өнөөгийн байдал үргэлжилнэ гэсэн үг. Д.Амарбаясгалан саатуулагдаж, ял авах ч эрсдэл өндөр. Авах гэхээсээ илүү авахуулна гэж ойлгох нь үнэнд нийцнэ.  

Эсрэгээрээ Д.Амарбаясгалан ялбал Засаг солигдоно. Засаг солигдсон ч Засгийн газрыг 100 хувь хөдөлгөхгүй нь тодорхой. Гэхдээ нэн тэргүүнд хөөгдөх сайд нар ч бас бий. Шуурганд туугдагсад гэдэгчлэн хамгийн түрүүнд халаа сэлгээний давалгаанд өртөх нөхөд бол Д.Амарбаясгалангийн хэлснээр  "МАН-ын хагарлын шалтгаан Г.Занданшатар, Я.Содбаатар, Б.Батцэцэг, Ж.Энхбаяр, Б.Энхбаяр нар хов зөөснөөс болсон. Энэ хүмүүс төрийн өндөрлөгүүдийн хооронд хов зөөдөг. Энэ ховноос нь болж Ерөнхийлөгч, Ерөнхий сайдын хооронд харилцаа хүйтэрч байсан” гэж хэлснээс үүсэлтэйгээр  Гадаад хэргийн сайд Б.Батцэцэг, Хөдөө аж ахуйн сайд Ж.Энхбаяр нар явах  нь тодорхой. Дээр нь нэмэгдээд Засгийн газрын хэрэг эрхлэх газрын дарга С.Бямбацогт, Аж үйлдвэр, эрдэс баялгийн сайд С.Дамдинням хоёр тодроод буй.

Намын хэрэг улсын хэрэг болж, УИХ-ын чуулганыг хойшлуулахдаа тулж, баасан гарагт баг бүлэглэлээрээ хор хорзоо найруулсан улстөрчид маргааш "бүүм"  дэлбэлж, ямар мэдээлэл, акц зохиох бол гэдгийг нийгэм намрын налгар өдөр шиг налайж суугаад хүлээж байна.

З.Урсгал