МАН хуралдав. Бага хурал бараг 24 цаг хуралдаж, шийдээ гаргав. Ширэн нүүрлээд хүчинтэй хүчингүй гэх яриа гаргаж л байна. Шуудхан хэлэхэд Г.Занданшатарын баг эцсээ хүртэл үзлээ. Янз нь тахимаа өгөхгүй дэвжээ тойрч гүйх зарим нэг бөх шиг арга мэх хайж л яваа байх, яг одоо. Хурлаа хаяж гараад л, төрхөм рүүгээ гүймтгий 18-тай бэр охин шиг л харагдлаа. Муухай...  Гэхдээ Бага хурлын үлдсэн 321 гишүүн нэг талдаа гарч чадлаа.  Одоо эргэж буцах гарц байхгүй. Гаргаж ч болохгүй жимээрээ, замаараа, жамаараа яв. Энэ нь эх оронд ч, эгэл бус түүхтэй МАН-д ч хэрэгтэй. МАН хүссэн хүсээгүй төрийн эрх баригч, бодлого тодорхойлогч. Одоо хэрэлдээд би чи хулгайч гэх цаг ч алга, зав ч алга.

Дээд шүүх дээр хүлээж авахгүй байж магад гэх яриаг ч чихнийхээ хажуугаар өнгөрөө. Дээд шүүхэд монгол хүн байгаа. 24 цаг хуралдаж байж УИХ-ын дарга Б.Амарбаясгалан 85.67 хувийн санал авч, намын тамгаа гардаж авлаа. МАН-ын Их хурал 11 дүгээр сарын 15-ны өдөр болохоор товоо тодорхойлсон. Тэр шийдийг үгүйсгэж, түмэн олонд, төр улсад төвөг болох сэтгэлтэн байхгүйд итгэж байна.

Нөгөөтэйгүүр энэ намын даргын асуудал бол энэ намын дарга нарын хэлж байгаачлан энэ намын дотоод асуудал биш. Монгол даяарын асуудал... Учир нь энэ нам бол Монголын улс төрийн талбай дээр үнэмлэхүй ноёлон тоглогч. Сонгуульд ялагдашгүй сүлжээ, бүтцийг байгуулж чадсан нам. Ийм ч учраас энэ намын даргаар хэн гарч ирэх нь улс орны хувь заяаны асуудал байгаа юм.  Үнэн, үе хоорондын болон фракц, бүлэглэл хоорондын хурц зөрчил, хэрүүл тэмцлийн дундуур ялагдашгүй намын даргын асуудал өрнөсөн.

Анхнаасаа бичиж л байсан. МАН-ын ахмад болон дунд үеийнхний У.Хүрэлсүхийн дор жагссан эвсэл, Л.Оюун-Эрдэнийг дагасан залуу МАН-ын бүлэг хоёр нэгэн нарны байх аргагүй болжээ гэж. Д.Амарбаясгалан ах нарынхаа шаардлагыг хүлээн авч бууж өгвөл намынхаа нэр хүндийг шороотой хутгаж Монголын улс төрд ноёлох байр суурийг нь ганхуулах аюулд оруулах байсан. Д.Амарбаясгалан тултал үзээд намынхаа нэр хүндийг аваад гарлаа. Тэр бууж өгсөнгүй яллаа. Амжилт, баяр хүргэе.

Нөгөөтэйгүүр Монгол бол та бидний эх орон. Эх орон маань өөдөлж дэгжих, улс үндэстэн маань энэ цагийн шуурганд тэсч үлдэх эсэх нь бидэнд бүг;эд хамаатай. Монголчууд нэг л хувь заяатай. МАН бол үнэндээ Монголын төр мөн. Улс орноо хэрхэн авч явах үзэл санаа, нийгэм, эдийн засгаа хэрхэн барьж байгуулах бодлого төлөвлөлт танай намд боловсрон, бодит байдал болдог.  Монгол төрийн бодлого эрдэс баялгийн олборлолтод зүй бус ноёрхлоо тогтоосон бүлэглэлийн дур зоргын хэрэг байж болохгүй. Улс орныг энэ цаг үеийг хүртэл удирдаж авч ирсэн МАН-ын ахмад, дунд үеийн удирдлага шинэ нөхцөлд байдалд ажиллах бодлогын хүчин чадлаа нэгэнт алдсаныг ард нийтээр харж, шүүмжлэн эсэргүүцэж байна.Энэ бүхнийг сөрөн зогсож чадах залуу, шинэ үеийн төлөөллөө даргаараа сонгож чадлаа гэж найдаж байна. Одоо л Монгол төр олигархын засаглалаас ангижирч чадна гэж хүлээж байна.  МАН-ын шинэ үеийн удирдлага Үндэсний төр, засаглал, бодлого, эдийн засаг, боловсролоо сэргээн тогтоож чадна гэж итгэж байна.