УИХ-ын дарга, МАН-ын даргад нэр дэвшихээ илэрхийлээд байгаа Д.Амарбаясгалан сэтгүүлчдийн асуултад нээлттэй хариуллаа. Тоймлон хүргэж байна. 

• Би МАН-ыг нээлттэй нам болгох гэж олон жил ажилласан. Институт болгох гэж хичээж ажилласан. Намайг нэр дэвшинэ гэж мэдэгдсэний дараа намайг айлгах гэж Чулуунзагдыг барьж хорьсон. Би айхгүй, ухрахгүй.
• АТГ-д намайг дэмжих Бага хурлын гишүүдийн нэрсийг прокурорт хуваарилж өгсөн. АТГ бол Засгийн газрын шууд удирдлагад байдаг. Бага хурлын үеэр тэр хүмүүс намайг дэмжихгүй бол би бүх нэрсийг зарлана. Ямар хэргээр сүрдүүлэгт орсныг нь ч зарлана.
• Г.Занданшатар, Я.Содбаатар, Б.Батцэцэг, Ж.Энхбаяр, Б.Энхбаяр нарын хүмүүс хов зөөж, намаа хагаралдуулж голоо зогоож байна
• У. Хүрэлсүх намын даргын асуудалд оролцохгүй гэдгээ хэлсэн. Бусад намын өмнөх удирдлагуудад ч хэлсэн гэсэн. намаа хагалж бутралгүй асуудлаа цэглээрэй л гэж надад хэлсэн.
• Г.Занданшатар хос даргатай больё гэсэн байж боломгүй хүсэлт тавьсан.
• Ерөнхийлөгчтэй хэвийн харилцаатай байгаа. юу боллоо гэж төрийн гурван өндөрлөг зодолдож нүдэлдээд байх вэ. Санал зөрөх, ярилцах зүйл бол бий. Бүх асуудлыг л ярилцдаг. маргах мэтгэлцэх зөндөө зүйл бий. 
• Намын Бага хурал дээр даргынхаа асуудлыг нэг мөр болгоно. Намын зовлонг төрийн түмний нийгмийн зовлон болгож болохгүй.

• Үндсэн хуульд өөрчлөлт оруулах замаар Ерөнхийлөгчийг дахин нэр дэвшүүлэх саналыг Я.Содбаатар, Ж.Энхбаяр гаргасан.

• Орчны бохирдлыг бууруулах үндэсний  хороог би түр хариуцсан юм. Тухайн үед сайдгүй байсан тул би ЗГХЭГ-ын даргын хувиар түр даргалсан. Энэ хорооны хурлыг би нэг л удаа даргалсан. Та бүхэн тэр хурлын протоколыг уншиж болно.  Протоколыг устгасан мэтээр ярьсан. Би протокол хадгалдаггүй, бичдэггүй.

• УИХ-ын гишүүн Б.Энхбаяр нэг ч үнэн яриагүй, бүх зүйл нь худлаа.

• УИХ-ын сонгуулийн өмнө хэнийг хаана нэр дэвшүүлэхийг нэг хүн шийддэггүй. Судалгаанд тулгуурлан шийддэг. Би найзыгаа нэр дэвшүүлэх эрх мэдэлгүй. Б.Энхбаяр Хууль зүйн сайд байхдаа Н.Өнөрцэцэгт ямар бяр гаргалаа даа. Төрийн нууцыг хадгалах үүрэггүй хүнийг нууц материал хадгалсан гээд хорьчихсон. Энэ нь хорих үндэслэл мөн үү. Баримтгүйгээр хүн хорьдгийг болих ёстой. Б.Энбаяр хүний нүд рүү эгц хардаггүй хүн шүү дээ.  Тэгэхээр яаж би тэр хүнтэй мэтгэлцэх юм бэ?       

• Одоогийн Ерөнхийлөгчийг дахин нэр дэвшүүлэх тухай яриаг би мэдэхгүй. Засгийн газар дотор ямар яриа гарсныг би мэдэхгүй. Ерөнхийлөгчтэй уулзахад ч энэ талаар яриагүй.   

• Энэ бямба гарагт (2025.09.27) МАН-ын Бага хурал болно. Тэр хурлаар би ямар дарамтад орсноо ярина. Өчигдөр УИХ-ын гишүүн Б.Энхбаяр илт худал яриа өглөө. Зальтай хуульч нар болзошгүй, би хардаж байна гэж ярьдаг. Тэр хүн "Амарбаясгалан "Админерал"-тай холбоотой гэж хэлээгүй. Ямар аймаар юм бэ. Буянд нь бузар ордоггүй юм байх даа.

• Би намын ЕНБД-аар ажиллахдаа эв нэгдлийг эрхэмлэсэн. Эрэгтэй, эмэгтэй, хөгшин, залуу гэж хүнийг ялгаагүй тул намын гишүүд надад сайн байдаг юм.     

• Манай намын голлох улстөрчид намайг дэмждэг. 

• Улс төрд байгаа хүмүүс нэгэндээ хатуу үг хэлдэг. Ийм зүйл болдог. Гэхдээ эргээд уулзах нүүртэй байх ёстой. УИХ-ын гишүүн С.Ганбаатарт одоо хэрэг үүсгэн, АТГ шалгаж байна. Энэ хүн 10-аад жилийн өмнө  ҮЭ-ийг удирдсан. УИХ-ын гишүүн Х.Тэмүүжинг мөн олон жилийн дараа шалгасан. Эдгээр нь хууль засагладаггүйн бодит жишээнүүд юм.       

• Ерөнхийлөгч НҮБ рүү явахаасаа өмнө зөвлөхүүдээрээ дамжуулан намыг хагалан бутаргаж болохгүй гэж хэлүүлсэн. Ерөнхийлөгч намын ажилд оролцдоггүй. Ерөнхий сайд Г.Занданшатартай би гурван удаа уулзсан. Надад хүлээж авах боломжгүй санал тавьсан. Жишээ нь, нам хоёр даргатай байх талаарх саналыг би хүлээж аваагүй.      

• Би Н.Энхбаяр гишүүнтэй муудалцаагүй. Тэр хүн төөрөөд, өөр намаас нэр дэвших гээд явж байхад нь би дуудаж, намаас нэр дэвшүүлсэн юм. Энэ хүний амьдралд би их том өөрчлөлт авчирсан. Би хүнтэй маргахыг боддоггүй, хүний  тухай биш асуудлын тухай ярихыг л хичээдэг. Гэвч Б.Энхбаяр том даалгавар авч, энэ бүхнийг ярилаа. 

• Би Ерөнхийлөгчтэй хэвийн харилцаатай. Санал зөрөлдөх асуудал гардаг. Тухайн үед ярилцаж, зөвшилцөх замаар ойлголцохыг л хичээдэг. Ухаа худагийн асуудал мартагдаагүй. УИХ 16 гишүүнтэй ажлын хэсэг  байгуулан, энэ ордыг хэрхэн хувийн хэвшилд шилжүүлснийг шалгаж байна. Засгийн газар харин эс үйлдэхүй хийж байна.              

• Манай нам асуудлаа хурдан шийдэж, ард түмний асуудлыг шийдэхийн төлөө ажиллана.