Өмнөговь аймгийн Засаг дарга Н.Энхбат нутгийнхаа хөгжилд дэвшилт тэр дундаа боловсролын салбарт дорвитой хөрөнгө оруулна хэмээн гоё сайхан үгсээр халхавч хийн Засаг даргаар томилогдсон. Гэтэл сэнтийдээ заларснаас хойш бага насны хүүхдүүдэд электрон тамхи зарахгүй хэмээн захирамж гаргаж, Тамгын газрын ажилчдаа энгийн хувцастай дэлгүүр, хоршоо хэсүүлж, тагнуул хийлгэж, худалдаа эрхлэгчдийг дарамтлан бааварлаж, ёс зүйгүй авирлах болсон нь цахим орчинд дэлгэгдсэн ч тэгсгээд устгагдсан. Өөрөөр үзээд өгье гэсэн ч гавьяагүй өнөөдрийг хүрсэн Н.Энхбат Засаг даргыг тойрсон дуулиан, шуугиан бол харин олон.

Начны найраа хийдэг Засаг дарга тендерийн наймаа хийдэг гэх мэдээлэл олон нийтийн мэдээллийн хэрэгслээр цацагдаж эхэлснийг Авлигатай тэмцэх газар мэдээгүй, шалгаагүй гэх. Мөн Сангийн яаманд тендерийн луйврынх нь талаар өчнөөн гомдол очсон ч шалгагдаж, хэрэг үүсгэлгүй, нам дарсаар өдгөөг хүргэсэн нь үе үеийн АН-ын ах нарынхаа цүнхийг нь сайн барьсаны шагнал гэдгийг учир мэдэх нэгэн нь ярьж, албан бус эх сурвалжууд өгүүлдэг.

Тендерийн 10 хувиар халаасаа зузаатгаж, хөрөнгө мөнгөтэй болсныг энэ удаад цухас дурдаад олон нийтэд ил мэдээлэл болох хөрөнгө орлогын мэдээлэл гарсан өгсөлтийг нь цухасхан дурдья. Тодруулбал, Өмнөговь аймгийн Засаг дарга Н.Энхбат 2007 оноос эхлэн Ажнайн Бат-Эрдэнийн туслах болж улмаар аймгийнхаа Хаан банкны захирал, ИТХ-ын төлөөлөгч өдгөө Засаг дарга болтлоо дэвшихдээ авдаг цалинд нь ангайж, бүлтийтэл өөрчлөлт гараагүй ч хөрөнгө нь өссөөр байна.

Тэрбээр 2022 онд 1,900,000 төгрөгийн цалинтай, 104 сая төгрөгийн үнэ бүхий орон сууцтай, 48 сая төгрөгийн үнэт эдлэлтэй, 55 сая төгрөгийн зээлтэй хэмээн өөрийн хөрөнгөө мэдүүлж байжээ. Харин Засаг дарга болсоор өрөө дарж 251 саяын харштай болж, 58 сая төгрөгний хадгаламжаар санхүүгээ зузаатгасан байх юм. Ямартай ч өнөө маргаашгүй ундгүй усгүй болох эрсдэлтэй аймгийг удирдаж байгаа хүний хувьд анхаарах асуудалд бус ар гэр, амин хувийн орлогодоо түлхүү анхаарч байгаа нь төрөөс төрсөн тэрбумтны жагсаалтыг нэгээр нэмж, ах нарынхаа араас аймаг бус вант улсын хаан хэмээн хамраа сөхөхөд ганц хуруу дутуу байгаа бололтой.