Цагтаа “шударга-5”-ын нэг хэмээгдэж явсан УИХ-ын Т.Аюурсайхан нүүрсний гэх хэрэгт холбодож бүрэн эрхийг нь УИХ-ын чуулганаар, прокурорын хүсэлтээр түдгэлзүүлж байсан.  Тэрбээр "Эрдэнэс Тавантолгой" ХК-ийн гүйцэтгэх захирал асан Б.Ганхуяг нарын 11 хүнд холбогдох хэргийн улмаас шүүхээс ял сонссон билээ. Тодруулбал, Нийслэлийн Прокурорын газраас Эрүүгийн хуулийн тусгай ангийн 22.1 дүгээр зүйлийн 1, 2 дахь хэсэг /Эрх мэдэл, албан тушаалын байдлаа урвуулан ашиглах/, 22.4 дүгээр зүйлийн 2, 4 дэх хэсэг /Нийтийн албан тушаалтан хахууль авах/, 21.2 дугаар зүйлийн 1 дэх хэсэг /Худал мэдүүлэх/, 20.3 дугаар зүйлийн 1, 3 дахь хэсэг /Зохион байгуулалттай гэмт бүлэг байгуулах, түүнд элсэх/, 22.10 дугаар зүйлийн 1, 2 дахь хэсэг /Үндэслэлгүйгээр хөрөнгөжих/, 22.5 дугаар зүйлийн 1 дэх хэсэг /Хахууль өгөх/, 18.6 дугаар зүйлийн 1 дэх хэсэгт /Мөнгө угаах/ тус тус заасан гэмт хэрэгт холбогдуулан яллагдагчаар татагдсан.  Анхан шатны шүүхээс УИХ-ын гишүүн Т.Аюурсайханд гурван жилийн хорих ял оноосон ч давж заалдах шатны шүүхээр хорих ялын хэмжээ буурч, 2 жил 8 сар болгосон. Ялаа бүтэн эдэлбэл мань эр 2026 оны нэгдүгээр сард суллагдах учиртай.

Гэхдээ хуулийн дагуу магадлангаар суллагдах боломж ч бас байгаа бөгөөд таван жил хүртэл хугацаагаар оногдуулсан хорих ялын хоёрны нэгээс доошгүй хувийг эдэлсэн нөхцөлд прокурорт хүсэлт гаргаж магадлангаар орох боломжтой юм байна. Холбогдох албанаас тодруулахад Т.Аюурсайханалбан ёсоор хүсэлт ирүүлээгүй, өөрөөр хэлбэл суллагдаагүй гэх хариултыг өглөө.

Дашрамд сануулахад тэрбээр УИХ-ын гишүүнийх нь бүрэн эрхийг түдгэлзүүлэх чуулганы хуралдааны үеэр миний бүрэн эрхийг түдгэлзүүлбэл би араасаа МАН-ын олон хүнийг чирэх болно хэмээх “заналхийлж” байсан билээ. Гэвч тэр хэн нэгнийг араасаа чирэлгүйчимээгүйхэн шоронд орж, Ж.Мөнхбат “шувуу” болон нисээд өнөөг хүртэл эх орондоо ирээгүй байна.