Л.Оюун-Эрдэнийн Засгийн газрыг “огцрох амархан” жагсаалаар хөөж байх үест, Төрийн ордонд тун ч идэвхтэйгээр дэмжиж байсныхаа төлөө Г.Занданшатарын Засгийн газарт сайдын суудал зайдагнаж амжсан тэрбээр айдастай байна. ИЗНН бол ногоон хөгжлийн төлөөх нам.   Байгаль орчин уур амьсгалын өөрчлөлтийн яамыг “баллаж” тавина гэж бодож байсан нь ч бас талаар болж байгаа нь тодорхой болчих шиг боллоо. 

Хэдийгээр тэрбээр нэр цэвэр үлдэхийн тулд Засгийн газраас гарахаар шийдсэн гэх утгатай мэдэгдэл өгсөн ч итгэх хүн алга. Уг нь мань эр АН Засгийн газраас гарсны дараа МАН-тай гар барьж БОУАӨ-ийн яамыг толгойлох эрхийг авсан.  Гэвч гурван сар ч бололгүй суудлаа  өгөх тухай мэдэгдлээ. Мэдээж түүний хувьд давхар дээл нөмрөх хүсэл хэвээр бий нь тодорхой. Гэвч АН, МАН-тай хэт ойр байгаа нь  дарамт нэмээд байгаа гэх. Басхүү салбартаа ажил явуулъя, өөрчлөе гэхээр С.Одонтуяагийн яаманд шургуулсан нөхөд дүүрэн байгаа учраас өөдөөс нь үл тоогчдоор дүүрсэн байхаа ядахгүй гэж таамаглагсдад бодит үнэнийг хэлчихье.

Шуудхан хэлчихэд мань эр томчуудын тоглоом дундуур “замени”-дчихсан. Улс төрийн талбарт шинэ хүн биш хэдий ч гэнэдчихсэн гэх гээд байна л даа. Тодруулбал, Л.Оюун- Эрдэнийг унагах шоглоомд идэвхийлэн оролцсоныхоо үйл лайг одоо чангахан хүртэх нь тодорхой болчихоод байгаа юм. Мань эр Г.Занданшатарын Засгийн газраас гарахдаа тулсан шийдвэрийн ардтай ах нарын тоглоомын үргэлжлэл оршиж буй. Д.Амарбаясгалн, Х.Баттулга, Л.Оюун-Эрдэнэ нарын зангирал буюу улс төрийн өшөө авалт намаржин өвөлжин бүр цаашлаад хаваржин үргэлжлэх нь тодорхой болсон. Эл тулааны хөлөөс гэнэ алдаж, Л.Оюун-Эрдэнийн эсрэг ажилласны шан болж, бууж ирэх нударганаас алуулчихгүйхэн сугарах сүүлийн хөзөр нь Г.Занданшатарын Засгийн газар “нэг л биш ээ” гэж хэлээд бултах явдал. Тэр өөрийн хүслээр зугтаж байж л бултана, шулуун цохилтоос... Шулуун цохилтыг дааж, давж гарах хүч тэнхээгүйгээ мэдчихсэн хүний л гаргах араншин юм даг уу даа. Энэ чигээрээ гүлдийвэл их улс төрөөс ор мөргүй арчигдчих гээд байдаг...