АН-ын Үндэсний бодлогын хорооны хурал өнөөдөр 10:00 цагт Төрийн ордны Их танхимд эхэлсэн. Хурал эхлэхийн өмнө Ардчилсан намын даргыг сонгох сонгуулийг зохион байгуулах үүрэг хүлээсэн Дотоод сонгуулийн хорооны дарга С.Эрдэнэболд Ардчилсан намын даргад нэр дэвшигч нараас 200 сая төгрөг хураасан асуудлаар “Намын даргад нэр дэвшигчид 2023 оны нэгдүгээр сард баталсан дүрмээр өрсөлдөж байна. Энэ сонгуулийг зохион байгуулахад 408 сая төгрөгийн зардал гарах тооцоо гарсныг нэр дэвшигч нар зардлыг хувааж гаргаж байгаа.
Зохион байгуулагчдын зүгээс 200 сая төгрөгийн сонгуулийн зардлыг төвлөрүүлээд бүртгэл дууссаны дараа 408 сая төгрөгөөс илүү гарсан зардлыг нэр дэвшигч дөрвөн хүн бүрийн данс руу буцааж шилжүүлсэн” гэх тайлбарыг өгсөн.
Ямартай ч цаг үе, нөхцөл байдлын хувьд АН оршихуй эс оршихуйг шийдэх түүхэн цагт болж буй энэ удаагийн сунгаанд УИХ-ын гишүүн, УИХ-ын дэд дарга Б.Пүрэвдорж, УИХ-ын гишүүн, УИХ дахь Ардчилсан намын бүлгийн дарга О.Цогтгэрэл, УИХ-ын гишүүн Ж.Баярмаа, Ардчилсан намын Үндэсний бодлогын хорооны гишүүн Б.Отгонбат нар өрсөлдөж байна.
Тодруулбал, ҮБХ нь нийт 380 гаруй гишүүнтэй, тэднээс хамгийн олон санал авсан өрсөлдөгч Ардчилсан намын даргаар сонгогдох учиртай.