Ховдын АН-ын даргаар их улс төрд хөл тавьсан Д. Пүрэвдорж, 2012-2014 онд Гадаадын иргэн харьяатын асуудал эрхлэх газрын дарга, 2014-2015 онд Иргэний харьяалал, шилжилт хөдөлгөөний ерөнхий газрын даргаар ажиллаж байсан туршлагатай нэгэн. Өөрөөр хэлбэл АН-ыг засаглах үед ийнхүү хоёр ч агентлагийн даргаар ажилласан гэсэн үг.

Уг нь мань багш мэргэжилтэй юм билээ. Гэхдээ багшаараа ажиллаж байсан үүх түүх үгүй. Ямартай ч түүнийг гишүүнээр ажиллаж байх үед буюу 2021 онд түүнд холбогдох хэргүүдийг АТГ-ын Мөрдөн шалгах хэлтэст сэргээн шалгаж байсан. Тодруулбал, АТГ-ын мөрдөгчид Ховд аймагт ажиллан, түүний хамаарал бүхий аж ахуйн нэгжүүдэд нэгжлэг хийж, санхүүгийн бичиг баримтуудыг нь хураан авч шалгалтаа үргэлжлүүлж байсныг хэвлэлийн хуудаснаас сөхөөд харчихаж болно.

УИХ-ын гишүүн Б.Пүрэвдоржийн хамаарал бүхий “Баруун монгол интернэйшнл” болон “Жинст транс” компанид ийнхүү нэгжлэг хийсэн шалтгаан нь Засгийн газрын тусгай сангийн хууль зөрчиж, Мал хамгаалах сангаас нэн хөнгөлөлттэй нөхцөлөөр их хэмжээний зээл авахад эрх мэдлээ ашиглан оролцсон гэх хэргийн нотлох баримтуудыг цуглуулахын тулд ийм ажиллагаа явуулсан гэдэг. Хэрхэн яаж шийдэгдсэн нь тодорхойгүй.

Ямартай ч түүний хамаарал бүхий хүн болох төрсөн эгчийнх нь нөхөр А.Цогт-Очирын үүсгэн байгуулсан “Жинст транс” ХХК “Өвөл, хаврыг өнтэй давъя” аяны хүрээнд 2017 онд Мал хамгаалах сангаас 1.3 тэрбум төгрөгийн зээлийг хүүгүй авсан байдаг. Түүнчлэн УИХ-ын гишүүн Б.Пүрэвдоржийг Иргэний харьяалал, шилжилт хөдөлгөөний ерөнхий газрын даргаар ажиллаж байхдаа эрх мэдлээ урвуулан, “Эрдэнэс Тавантолгой” ХХК-иас нүүрс тээвэрлэдэг, БНХАУ-ын 306 иргэнд виз олгохдоо холбогдох хууль тогтоомж зөрчсөн. Ажиллах хүч гадаадад гаргах, гадаадаас ажиллах хүч, мэргэжилтэн авах тухай хуулийн холбогдох заалтыг зөрчсөний улмаас улсын төсөвт 236 сая гаруй төгрөгийн хохирол учруулсан гэх үндэслэлээр шалгаж байсан удаатай.

Б.Пүрэвдоржтой холбоотой таагүй мэдээлэл үүгээр дуусахгүй. Тухайлбал УИХ-ын 2016 оны сонгуулийн үеэр “Аймаг хөгжүүлэх сан”-гаас Мах боловсруулах үйлдвэр барих нэрээр 350 сая төгрөгийн зээл авсан ч махны үйлдвэрээ бариагүй. Нэмээд Хүнс хөдөө аж ахуйн хөнгөн үйлдвэрийн яамнаас 400 сая төгрөгийн зээл нэмж авсан ч зээлээ зориулалтын дагуу зарцуулаагүй, үнэтэй жип автомашин худалдан авсан байсныг тухайн үеийн Ховд аймгийн Засаг дарга олноо дэлгэж байв. Харин өдгөө өгч байгаа бодит мэдээлэл гэвэл эрхэм гишүүн маань махны бизнестэй юм билээ. Энэ мэтээр дурдаад байвал Б.Пүрэвдоржийн асуудал дуусахгүй.

Улс төрд орж ирээд овоо удсан ч АН хэдэн хэсэг хуваагдах үед ч аль ч талд оролгүй дундыг баримталж явсан тэрбээр өдгөө АН-ын даргад нэр дэвшиж байна. Өө нээрээ мань хүнийг Ц.Элбэгдоржийн дүү гэдэг тодотгол дагадаг байсан ч Ерөнхйилөгчөөс буусных нь дараачаас Х.Баттулгийг бараадан гүйдэг болсон тухай шивэр авир яриа ч бас байдаг.