Ардчилсан намын даргын сонгуультай холбоотойгоор УИХ-ын гишүүн, ҮБХ-ны Дотоод сонгуулийн хорооны дарга С.Эрдэнэболд тэргүүтэй гишүүд мэдээлэл өгсөн юм. Тодруулбал, АН-ын Үндэсний бодлогын хороо өчигдөр хуралдаж, 15 хүний бүрэлдэхүүнтэй баг байгуулжээ. Багийг УИХ-ын гишүүн С.Эрдэнэболд ахалж, УИХ-ын гишүүн О.Баасанхүү дэд даргаар ажиллах юм байна. 

Баг намын даргад нэр дэвшсэн хүмүүсийн бичиг баримттай танилцан, нэр дэвшигчийн шалгуурыг хангасан, эсэхийг хянах ба шаардлага хангасан нэр дэвшигчийг бүртгэн, Үндэсний бодлогын хорооны гишүүдэд танилцуулах агаад намын даргыг ҮБХ-ны 390 гишүүний дийлэнхийн шийдвэрээр сонгох нь ээ.

Нэр дэвшигчийн мөрийн хөтөлбөр АН-ын мөрийн хөтөлбөртэй нийцсэн, эсэх гэх мэт хэд хэдэн шалгуурыг харгалзах юм байна. АН 200 орчим мянган гишүүнтэй. АН-ын шинэ дарга 2027 оны Ерөнхийлөгчийн, 2028 оны УИХ-ын сонгуульд намаа удирдан ажиллах үүргийн хүлээнэ.

Түүнчлэн С.Эрдэнэболд, "АН гурван удаа дараалан УИХ-ын сонгуулийн үр дүнгээр сөрөг хүчин болсон. Улсын дээд шүүхэд бүртгүүлсэн дүрмээр намын даргыг сонгоно. Энэ нь дан ганц АН-ын даргыг сонгох асуудал биш юм. Улс орны эдийн засаг хүнд байдалд байна, дарга анги данхайсаар байна. Энэ мэт асуудлыг шийдэж чадах хүн намын дарга болох ёстой"  гэлээ.