АН-ын ҮБХ-ны ээлжит бус хуралдаж байна. хуралдпааны завсарлагаанаар АН-ын дарга Л.Гантөмөрт цөөн асуулт тавилаа.

-Намын дүрэм, намын дарга тодруулах тухай асуудал хөндөгдөх байх. Өөр ямар асуудал байна вэ?

-ҮБХ-ны ээлжит бус хурлаар гурван асуудлыг хэлэлцэж, шийдвэр гаргах учиртай. Нэгдүгээрт Улс төрийн намын тухай хуулийн дагуу намын дүрмийн зарим нэг өөрчлөлтүүдийг хийх үүрэгтэй. Мөн намын мөрийн хөтөлбөрийг баталж, Дээд шүүхэд бүртгүүлэх үүрэгтэй. Гуравдугаарт, намын даргын сонгуулийг явуулах чиглэлийг би ҮБХ-нд өгч байгаа. Миний хувьд үүрэгт ажлаасаа чөлөөлөгдөх хүсэлтээ албан ёсоор гаргана. Асуудлыг хэрхэн шийдэх тухай асуудлыг ҮБХ хуралдаж, намын дарга сонгох журмын дагуу сонгуулиа явуулна гэдэгт итгэж байна.

-Яг одоо Дээд шүүхэд бүртгэлтэй байгаа АН-ын дарга сонгох тухай журмын дагуу явах юм уу, эсвэл шинэчилсэн дүрмийн дагуу сонгуулиа явуулах юм уу?

-Ер нь АН бол зовлон үзсэн нам. Хоёр хуваагдаж, даргагүй, бүртгэлгүй явж л байсан. Харин одоо албан ёсны хурлаа хийж, албан ёсны шийдвэрээ л гаргана.

-Таны хувьд дараагийн дарга АН-ыг ямар үүрэгтэй хүлээж авч байна гэж хэлэх вэ?

-Өнөөдөр аль ч судалгаагаар АН нэгдүгээрт байгаа. Өөрөөр хэлбэл, төрийн эрх барьж буй МАН-аас намын рейтингийн хувьд дээр нь байгаа. Тиймээс намын дарга цаашдаа АН-ын эв нэгдлийг хангаж, үнэнчээр ажиллах, хоёр нүүргүй байх зайлшгүй шаардлага байна. Мэдээж хүчтэй сөрөг хүчний ажил хийх үүрэг даалгавар оногдож байгаа.

Мөн шинэ дүрмийн дагуу намын бүх шатны байгууллагуудыг дахин зохион байгуулах нүсэр их ажил хүлээж байна. Хамгийн гол нь илүү ухаалаг, ард түмнийхээ талд байж чаддаг хүнээ намын даргаар сонгож чадна гэдэгт итгэлтэй байна.

-Ардчилсан намын байр байсан газрын маргаан хэрхэн шийдэгдсэн бэ?

-Тэр газар дээр барилга баригдаж, тэндээс АН өөрийн гэсэн сууцаа авна гэсэн гэрээтэй. Өнөөдрийн байдлаар баригдаагүй л байна.

-Хэн тэр газрыг зарчихсан юм бэ?

-Их олон жилийн өмнөх яриа л даа. Энэ байраа нурааж, шинэ барилга барьж одоо байгаагаасаа илүү мкв-тай байртай болох зорилгыг тавьж, хийсэн хэлцэл.

-Та өөрийгөө АН-ын даргын үүргийн хэр гүйцэтгэсэн гэж бодож байна вэ?

-Ард түмэн дүгнэж байгаа байх аа. Өнөөдөр АН, МАН-аас рейтингээрээ илүү байна гэдэг... Би сонгуульд орохын өмнө  таван хувьтай нам хүлээж авсан.  Тухайн үед МАН манай намаас 2-3 дахин өндөр рейтингтэй байсан. Өнөөдөр эрх баригч намаас илүү өндөр рейтингтэй намыг л хүлээлгэж өгч байна. Сайн мууг түүх өөрөө дүгнэх учиртай. Ямартай ч намаа хуваачихсангүй, алдаж асгасангүй. Гантөмөр гэдэг хүн намын даргаар сонгогдож байхад санал өгч байсан бүрэлдэхүүнээс хэн нэгэн хүнийг хавчиж, гадуурхаж, шахалт үзүүлж, эс бол хол байлгах зүйл гаргахгүй байхыг хичээсэн. Энэ бол Монголын төлөө л үйл хэрэг. Өөртөө байгаа үүргээ өөрийнхөө цаг хугацаанд нэр төртэй гүйцэтгэх нь улстөрч хүний мөн чанар байх ёстой л гэж бодож байна.

-Намын дарга болоход болзол байгаа. Өөрчлөгдөх юм уу, өөрөөр хэлбэл намын даргын сонгууль шинэ дүрмээр явагдах уу?

-Энэ болгоноо ҮБХ өөрсдөө яриад шийдэх эрх нь энэ зааланд, тодруулбал намын удирдах дэд байгууллагад байгаа. Тэр эрх рүү хүн болгон өөрийн бодлоор халдаж болохгүй. Хурал дээр янз бүрийн санал яригдана.  Ардчилал бол олонхийн засаглал. Олонхийн шийдвэрээ цөөнх нь хүндэтгээд явах учиртай.

-ҮХБ 50 гаруй гишүүнтэй гэтэл одоо 36 орчим хүний ирцтэйгээр хуралдаж буй нь буруу, ирцээ 100 хувь болгох ёстой гэх шүүмж бас байна л даа?

-Бид Засгийн газарт байсан бол өнөөдөр дүрмээ батлаад, 11 сард албан ёсоор намын даргын сонгууль хийнэ гэсэн төлөвлөгөөтэй ажиллаж байсан. Гэтэл бидний Монголын төлөөх зорилгыг МАН уландаа гишгэсэн. Тиймээс Гантөмөр гэдэг улс төрийн шийдвэрээр сонгогдсон бол өдгөө сонгогдсон байгууллагаасаа улс төрийн шийдвэрээр дараагийндаргаа сонгох цаг хугацаатай тулчихлаа. Бид хоорондоо маргах биш, эндээ ярьж байгаад шийдвэрээ гаргаад урагшлах хэрэгтэй. Гантөмөр энэнээс илүү, удаан хугацаагаар намын даргаа өгөхгүй гээд байгаа юм шигээр асуудалд хандаж болохгүй гэдэг миний ганцхан зарчим байгаа.