Гэр бүл, хөдөлмөр, нийгмийн хамгааллын сайд Т.Аубакир,  Узбекистан Улсын шадар сайд, Гэр бүл, эмэгтэйчүүдийн улсын хорооны дарга Зулайхо Бахриддиновна Махкамоватай /2025.08.25/ уулзлаа.  Уулзалтаар эмэгтэйчүүдийн хөдөлмөр эрхлэлт, нийгмийн оролцоо, жендэрийн тэгш байдлын талаар хоёр улсын туршлагыг хуваалцжээ.

2024 оны 1 дүгээр сард Дэлхийн Эдийн Засгийн Форумаас гаргасан Жендэрийн Тэгш бус байдлын Индексээр Монгол Улс 143 орноос 85-д жагссан.  Харин эмэгтэйчүүдийн боловсролын болон эрүүл мэндийн амжилтаар дэлхийн 20 орны хамтаар 1 дүгээр байранд орсон бол эмэгтэйчүүдийн эдийн засгийн оролцооны үзүүлэлтээр 43-т, эмэгтэйчүүдийн улс төрийн оролцооны үзүүлэлтээр 133-т эрэмбэлэгдэж байна.

Түүнчлэн 2020-2024 онд УИХ-д сонгогдсон эмэгтэй гишүүдийн тоо 13 буюу 17.4 хувийг эзэлж байсан бол 2024 оны УИХ-ын сонгуулиар парламент дахь эмэгтэйчүүдийн төлөөлөл өсөж, Улсын Их Хуралд 32 эмэгтэй гишүүн төлөөлөл болон ажиллаж байна. Манай улсад 2024 оноос “Гэр бүлийн” яам байгуулагдаж эмэгтэйчүүд, хүүхдийн эрхийн асуудлыг цогцоор авч үзэн, хууль эрх зүйн орчин илүү сайжирч байгааг Гэр бүл, хөдөлмөр, нийгмийн хамгааллын сайд Т.Аубакир хэллээ.

Узбекистан Улсын хувьд ч мөн эмэгтэйчүүдийг дэмжих, нийгэм дэх оролцоог нэмэгдүүлэхээр ажиллаж байгааг Узбекистан Улсын шадар сайд, Гэр бүл, эмэгтэйчүүдийн улсын хорооны дарга Зулайхо Бахриддиновна Махкамоваг цохон тэмдэглэлээ.  Узбекистан Улсын Гэр бүл, эмэгтэйчүүдийн улсын хороог байгуулж, хороогоор дамжуулан эмэгтэй бизнес эрхлэгчдийг дэмжиж, хөнгөлөлттэй зээлд олгож мөн үнэ төлбөргүй сургалтад хамруулах ажлыг хийдэг байна.

Үүний үр дүнд томоохон бизнес эрхэлдэг эмэгтэйчүүд бий болж, нийгэм дэх жендерийн тэгш байдалд эерэг өөрчлөлт гарах болжээ.  Хоёр улс харилцан бие биеэсээ туршлага хуваалцах, нийгэм дэх эмэгтэйчүүдийн оролцоог нэмэгдүүлэхэд хамтран ажиллах боломж байгааг талууд онцоллоо.