УИХ-ын Пүрэв гарагийн хуралдаан үргэлжилж байна.  Төрийн албан хаагчийн ёс зүйн тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна.

Энэ үеэр УИХ-ын гишүүн Б.Пүрэвдорж “Миний урдаа тавьдаг “болкат”-ыг эрх баригчид хураагаад аваад явчих юм.  Гэхдээ миний туслах 3 минутад хэвлэдэг гэдгийг анхаараарай. “Тэтгэврийг 7 жил биш 5 жилээр болгох” гэдэг миний хэлээд байгааг ерөөсөө авч хэлэлцэхгүй байна. Энэ дээр байнгын хорооны дарга ерөөсөө ажил хийхгүй байна. Дарга нар дуудаж загнахаас өөр зүйл хийхгүй байгаа нь хүмүүсийн бухимдлыг хүргэж байна. Хэрэв энэ асуудлыг ирэх долоо хоногт хэлэлцэх асуудлын жагсаалтад оруулахгүй бол Нийгмийн даатгалын сангаас 1 га газар 14 тэрбумаар худалдаж авсан асуудлыг газар дээр нь очиж хэвлэлийн хурал хийнэ. 14 тэрбум  гэдэг бол  2019, 2020, 2021 онд 7 жилээр тэтгэврээ бодуулсан ахмадуудын зөрүүг өгөх боломжтой мөнгө. Нийгмийн даатгалын мөнгөөс хулгайлж завшихын тулд хүмүүсийн тэтгэврийг бага боддог байдлаасаа салах ёстой. 7 жилээр тэтгэвэр боддог тогтолцоо ганцаараа үлдчихлээ. Энийг хэлэлцэхгүй бол 14 тэрбум төгрөгөөр нэгхэн га газар худалдаж авсан асуудлыг дэлгэнэ.  Мөн Нийгмийн даатгалын сангийн дарга нар буюу МАН-ын “цүнх баригч”-дын хулгайг ойрын үед бүгдийг нь гаргаж дэлгэнэ” хэмээж 5 минутын үг хэлэх эрхээ эдлэв.  Чуулганы хуралдаан үргэлжилж байна.