Ерөнхийлөгчийн сүүлийн үеийн айлчлал, манай улсад сүүлийн жилүүдэд ирсэн төрийн тэргүүнүүд гэхэд л дандаа хуучин ЗХУ-ын бүрэлдэхүүнд байсан социалист улсууд болчихлоо. Өдгөө Оросоос өрх тусгаарласан ч В.Путины нөлөөнөөс гарч чадаагүй ядуу буурай хэвээр, социалист гэсэн нэршилгүй ч төр нь дарангуйлсан чигээрээ  яваа цөөхөн орныг дэлхийн хөгжилтэй гүрнүүд  “стан” гэж хөөрхийлөн тодотгодог юм.

Хатуухан хэлэхэд Монголын гадаад харилцаа энэ  “стан”-ууд дунд л эргэлдэж байна. Уг нь өдрөөс өдөрт хувьссаар хөгжсөөр буй  дэлхийд тэд биш АНУ, Япон, Солонгос, Европын нөлөө бүхий улсууд тэргүүлдэг. Яг үнэндээ Гадаад харилцааны сайдад эдгээр улсын төрийн тэргүүнүүдийг урьж хиймэл оюун ухаан, шинэ технологи, шинэ эдийн засаг, шинэ геополитикийн хэмжээний яриа хэлэлцээр хийлгэх чадал чадамж алга. Түүний чадал “Стан” хавьцаа л эргэлдэж байна.

Саяхан л АНУ В.Путины эхлүүлсэн дайнд ОХУ-ыг буруутгаж байсан бол Трамп сонгогдонгуут Путинд “хайр зарласан” алхмууд хийж Европыг алмайруулсан. Ноён Трамп ахиад ямар ч алхам хийж магадгүй, технологийн дайн хаашаа ч эргэж мэдэх нөхцөлд дэлхийгээрээ аж төрж байна. Өдрөөс өдөрт өнгөө эрс тэс хувиргаж буй гадаад харилцааны салбарт геополитикийн талаар туйлын өндөр мэдрэмж, мэдлэгтэй Гадаад харилцааны сайд нар л улсаа дажгүй авч явахаар болчихлоо. Зарим айхавтар улсад Гадаад харилцааны сайд нь Ерөнхий сайдаасаа ч нэр хүндтэй яваагийн цаад учир  ерөөсөө л энэ.

Дэлхийд цэрэг, улс төр, эдийн засаг, технологийн хувьсал болж, хиймэл оюун ухаан хүн төрөлхтний өнөөдрийг яаж ч өөрчилж мэдэх энэ  үед улс орнууд гадаад харилцааны цоо шинэ, асар нарийн мэдрэмж бүхий ухаалаг бодлого  бариад удаж байна.

Гэтэл манай улсын гадаад бодлого өнгөрсөн зуундаа таг гацчихаад байна. Гадаад харилцааг өнгөрсөн зуунд нь гацаагч сайд хэзээ болтол Монголыг хорлох вэ гэсэн бухимдал иргэдэд байна.

Нөлөө бүхий дипломатчдын “Орчин цагийн дэлхийн томчуудтай хэл үг, мэдрэмж чадал нийлэх хүнд улсынхаа  гадаад харилцааг даатгах цор ганц зам л Г.Занданшатарт үлдсэн. Тэгж байж л шинэ дэлхийд улсаараа хөгжиж чадна” гэсэн учирлалыг Ерөнхий сайдад дуулгая.