Нэмэлт: 14:30 цаг

Шүүх Н.Түвшинбаярыг хүнийг алах гэмт хэргийг онц харгис хэрцгийгээр үйлдсэн гэж үзлээ

ХУД-ийн Эрүүгийн хэргийн шүүхээс Н.Түвшинбаярт 16 жилийн хорих ял оноож, нээлттэй хорих ангид эдлүүлэхээр шийдвэрлэлээ. 

Прокуророос шүүгдэгч Н.Түвшинбаярт 19 жилийн хорих ялыг хаалттай хориход эдүүлэх санал гаргаж, хөнгөрүүлж үзэх нөхцөл байдал байхгүй гэж үзэж буйгаа илэрхийлсэн. Хохирогчдын өмгөөлөгчдөөс санал гаргаагүй юм.

Хэргийг шүүх хуралдаанаар хэлэлцэж шүүгдэгч Н.Түвшинбаярыг хүнийг алах гэмт хэргийг онц харгис хэрцгийгээр үйлдсэн, бусдын эд хөрөнгийг хууль бусаар утсгаж гэмтээсэн, хохирол учруулсан хэрэгт гэм буруутайд тооцлоо. 

Анхан шатны шүүхийн энэхүү шийдвэрийг хуулийн дагуу тэрбээр давж заалдах эрхтэй юм.

Нэмэлт: 11:50 цаг

ГЭРЧҮҮД ЗОДООНЫГ ЯАГААД САЛГААГҮЙГ ГАЙХАЖ БАЙНА

Н.Түвшинбаяр шүүх хуралдаанд эцсийн үгээ хэллээ.

Тэрбээр "Найз маань миний хамгийн сайн найз байсан. Миний амжилт бүхэн найзтай минь холбоотой. Хийж болохгүй үйлдэл хийсэндээ маш их харамсан, гэмшиж байна. Талийгаачийн аав ээж, хань ижил, үр хүүхдүүдээс чин сэтгэлийн уучлалт хүсч байна. Монголын ард түмнээс бүгдээс нь уучлалт хүсч байна" хэмээн шүүх танхимд уйлав.

Шүүгч тайвширч байгаад үгээ хэлэхийг хүссэн юм. Хэсэг хугацааны дараа үргэлжлүүлэн хэлэхдээ "Хуулийн өмнө хариуцлага хүлээхээ ойлгож, гэм буруугаа ойлгож байгаа. Эрхэм шүүгчид ээ, хуулийн дагуу шийдэж өгнө үү. Боломж олдвол найзынхаа гэр бүл, үр хүүхдүүдийг нь насан туршдаа тусалж, дэмжих болно" хэмээгээд шүүх танхимд байсан бүх хүмүүсээс уучлалт гуйлаа.

Үүний дараа шүүх хуралдаанд оролцож буй иргэдийн төлөөлөгчид саналаа хэлсэн юм. Тэдний хувьд хамт байсан гэрчүүд зодооныг салгах боломжтой байсан нь хурлын явц дахь мэдүүлгүүдээс харагдаж байна.

Мөн түргэн тусламжийг яаралтай дуудсан бол аврагдах боломж байжээ гэж харж байна" хэмээж байв.

Ийнхүү талуудын байр суурийг сонсож дуусаад, шүүгчид зөвшилцөхөөр шүүх хурал түр завсарлалаа.

11:00 цаг

Олимпийн аварга Н.Түвшинбаярт холбогдох хэргийн шүүх хурал Хан-Уул дүүргийн Эрүүгийн хэргийн анхан шатны шүүхэд хоёр дахь өдрөө үргэлжилж байна. 

"Хохирогчийн талд өгөх гээд байгаа хоёр үл хөдлөх нь 6 м.кв павилон"

Шүүх хурлын үеэр Б.Нандинцэцэгийн өмгөөлөгч Б.Баасанжаргал "Хатуу боловч нэг зүйлийг хэлье. Н.Түвшинбаяр гэдэг хүн олимпын алт, мөнгөн медаль, үндэсний бөхийн заан цол хүртсэн бүх амжилтууд талийгаач Э.Энхбат гэдэг хүнтэй салшгүй холбоотой. Хэн ч маргахгүй.

Мөн Н.Түвшинбаярыг өвдгөндөө зөөлөн эдийн гэмтэл авсан байхад талийгаач эхнэрийнх нь оронд асарч халамжилж хөл дээр нь босгосон. Хоёр үл хөдлөх хөрөнгө өгч байгаа гэсэн мэдээлэл өчигдөр гарсан. Энэ талаар ярихгүй бол болохгүй байна.

Хоёр үл хөдлөх хөрөнгө гэдэг нь зургаан м.кв талбайтай бараа зардаг павильон юм байна. Ийм зүйлээр хүний амь насыг үнэлж болох уу?

Би бичгийг нь харсан. Нэг бүрийг нь 60 мянган ам.доллароор үнэлсэн байсан. 180 сая төгрөгийн үнэтэй 6 м.кв павильон гэж байх уу? Үүгээрээ хор уршгийг арилгалаа гэж үзэж болох уу? 

Энэ хэргийн улмаас учирсан хохирол гэдэг бол талийгаач өөрөө юм. Үүнийг үнэ мөнгөөр үнэлэх боломжгүй.

Хор уршгийн тухайд эмчилгээ, оршуулга, тэжээгчээ алдсаны тэтгэмж, сэтгэл санааны хохирол гэх мэт мөнгөн дүнгээр илэрхийлэгдэх юмсыг төлж барагдуулж болно. 

Энэ байдлаараа хүн сонсоход их хэмжээний мөнгө төлсөн мэт сонсогдож байгаа боловч миний өмгөөлж байгаа хүнийг орлох хэмжээний эд зүйл биш" гэж байр сууриа илэрхийллээ.

Шүүх хурлын тухай тоймыг эндээс үзнэ үү.