УИХ-ын Пүрэв гарагийн хуралдаан эхэллээ.   Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл  хэлэлцэж байна.

Хэлэлцэж буй асуудалтай холбоотойгоор гишүүд асуулт асууж, хариулт авч байна.

УИХ-ын гишүүн Б.Энхбаяр “Өөрсдөө ашиг сонирхлоос ангид байж чадахгүй, концесс гээд гүйгээд явж байдаг байж яаж Төрийн албан хаагчийн ёсзүйн тухай хууль ярих гээд байгаа юм. Төрийн нүдээр биш хувийн хэвшил, улс орныхоо нүдээр харж хуулиа хийе” гэв. 

Мөн УИХ-ын гишүүн М.Оюунчимэг “Манай бүтээн байгуулалтын ажил улирлын чанартай, хэдхэн сар хийгддэг.  Гэтэл хууль оройтож орж ирж байна. Бид яам болон Засгийн газраас орж ирж байгаа хуулийг яаравчлуулмаар байна. Сүүлийн үеийн үнийн өсөлт, хил гаалийн асуудлаас болж  ажил жигдрэхгүй байна. Манай яам тамгын газар дээр хүнд суртал маш их байна. БХБЯ-ныхан хүнд суртал гаргаад, аж ахуй нэгжүүдийг залхааж байна. Ажил явахгүй байж байгаад эсхүл мөнгө нь татагдаж байна. Үүний үр дүнд иргэд хохирч байгаа. Санхүү мөнгийг нь гүйцэтгэлээр нь цаг тухайд нь гаргаж өгөх, хүнд суртал гаргахгүй байх чухал байна. Төр, хувийн хэвшил гэж яриад байгаа хэрнээ яамдууд хүнд сурталтай байх ёстой юм уу. Эдийн засаг амаргүй байгаа үед аль болох бүтээн байгуулалт хийж, иргэдийн орлогыг дэмжмээр байна” гэлээ.

УИХ-ын гишүүн Д.Сарангэрэл “Хөгжлийн бэрхшээлтэй хүүхдийн эцэг, эх Төрийн ордны гадна хонож байна. Монгол улсын эм тарианы 80 хувь гаднаас хамааралтай. Хөгжлийн бэрхшээлтэй хүүхдүүдийн хэд хэдэн нэр төрлийн буюу 29 төрлийн эм тасалдсан байна. Эрүүл мэндийн яаманд яаралтай чиглэл өгөхгүй бол болохгүй нь ээ. Тасарсан эмний асуудлыг анхааралтай авах хэрэгтэй байна. Барилга, хот байгуулалтын яамныхан чуулганд хэдийгээр байхгүй байгаа ч Сангийн яамныхад хандаж үг хэлэе.  Ковидтой холбоотой барилгын материалын үнэ 80 хувь өссөн байна. Энэ өсөлтийг тооцохгүйгээр ажил явуулж байна. БХБЯ, Сангийн яам ийм үүрэг өгөөд байхаар яах юм бэ. Улсын төсвөөр санхүүжих төсөв арга хэмжээ, төсөвт магадлал хийх тухай тогтоолыг УИХ цаг үеэ мэдрээд гаргаад ирчихсэн байна. Гэтэл өмнөх оны бүтээн байгуулалтаа хийгээгүй байж дараагийн бүтээн байгуулалтуудыг тавиад байх юм. Алдагдалтай байна уу, ашигтай байна уу дуугай ажлаа гүйцэтгэ гээд яваад байх юм уу. Цалин тээвэр, машин, тоног төхөөрөмж, материалын үнэ тооцохгүй байгаагаас барилгын компаниуд сүйрлээ шүү дээ. УИХ-ын дарга яамдуудад тодорхой сануулга хэлэхгүй юм уу” хэмээн ундууцав.