Ямар сайндаа л нэрт сэтгүүлч Г.Жамъян агсан  “Их мөнгөтэй баян тансаг хүн олон болсон. Гэхдээ би Ж.Ганбаатар шиг “буруу сэхэж” байгаа хүнийг даанч үзсэнгүй. Ард түмэн минь, аль ч намын гишүүн байсан та нар дараа дараачийн сонгуульд хэдэн төгрөг, борлуулалтгүй бараа материал, гурил будаанд хууртаж төрд гаргаж ирэв дээ” гэж захиж бичиж байхав дээ. Өвгөн сэтгүүлч лав түүний буруу замаар яваад байгааг олоод харчихаж. Улс төрд маш богино хугацаанд хүчээ авч буй хүн бол “Оргил”-ын хэмээх Ж.Ганбаатар. Өнгөрөгч 2016 онд УИХ-ын гишүүн, 2019 онд Эдийн засгийн байнгын хорооны даргын албан ирж.

Түүний хувьд нэгэн насаараа хувийн бизнес өрнүүлж довоо шарлуулсан л хүн учраас олон нийтийн төлөө, тэр тусмаа төрт ёсны төлөө ажиллаж чадах хүн биш байх. Тухайлбал, ганзагын наймаанаас сүлжээ дэлгүүрийн бизнест орж, улмаар Нийслэлийн иргэдийн хурлын төлөөлөгчөөр сонгогдсон даруйд барилгын салбар руу орсон. УИХ-ын гишүүн болоод бизнес нь өргөжсөн үү гэхээс хумигдаагүйг олон зүйлээс харж болно.

Тэгвэл түүний Хөрөнгө орлогын мэдүүлгээс авч үзье. Ж.Ганбаатарын хувьд 2018 онд жилийн 217 сая төгрөгийн орлого олсон гэдгээ мэдүүлжээ. Харин хадгаламж нь гурван тэрбум төгрөгөөр өссөн байна. Жилийн орлогоосоо хэд дахин илүү мөнгийг хадгалсан гэсэн үг. Тэрбээр УИХ-ын гишүүн болсноосоо хойш хадгаламжаа есөн тэрбум төгрөгөөр өсгөж чадсан. Тухайлбал, 2015 онд 13 тэрбум төгрөг, 2016 онд 18 тэрбум төгрөг, 2017 онд 19 тэрбум төгрөг, 2018 онд 22 тэрбум төгрөгийн хадгаламжтай болсон гэдгээс хараарай. Мөн Жижиг дунд үйлдвэрийг хөгжүүлэх сангаас зээл авсан гишүүдийн дунд нэр нь байсан ч асуудал чимээгүй өнгөрсөн. Энэ мэт бараан зүйлс, бодит баримт л хардахад хүргэж байгаагаас бус түүнийг  гүтгэсэн зүйл нэг ч байхгүй. Нөгөө талаар хэвлэл мэдээллийн хэрэгсэл, олон нийтийн хандлагыг буулгаж байгаа хэрэг.  

Хэтдээ ч улс төрд ихэд өндөр авч магадгүй хөрөнгөтөн бол Ж.Ганбаатар гэдгийг улс төрийн хүрээнд ярьдаг. Тэрбээр УИХ-ын гишүүнээр сонгогдоод удаагүй байхдаа намын дарга У.Хүрэлсүхтэй чуулганы хуралдаан дээр хэрүүл хийсэн. Харин У.Хүрэлсүх “Чи анх удаа УИХ-д сонгогдсон хэр нь их пээдэлзээд байгаа шүү. Намайг УИХ-ын гишүүн байгаагүй гэж бодоо юу. Би хэд хэдэн удаа УИХ-д сонгогдож, наад танхимд чинь сууж байсан юм. Чам шиг бацаан ингэж пээдэлзэх болоогүй шүү" хэмээн хүртэл хэлж байв. Манай сонгогчдын боловсрол болон сэтгэл зүй бэлтгэгдээгүй байгааг Ж.Ганбаатар нарын хөрөнгөтнүүдийг сонгоод байгаагаас харж болно. Ийм буруу сэхсэн хөрөнгөтнүүдийг төрд гаргаад байхаар хөрөнгө мөнгөө л арвижуулна уу гэхээс иргэн танд ямар ч хэрэг болдоггүйг ойлгох цаг нь болсон баймаар юм.

Дээр дурдсан баримтаас харахад тэрбээр улс төрд хөл тавиад хөрөнгө мөнгөний хэмжээ нэмэгдсэн гэдгийг харж болно. Бизнес нь ч эгэл түмэнд хүртээлтэй зүйл байгаагүй. Учир нь тэр өндөр үнэтэй, тансаг зэрэглэлийн орон сууцны хороолол босгож, баячуудад үйлчилнэ. Сүлжээ дэлгүүр нэрээр өндөр үнэтэй өргөн хэрэглээний бараа бүтээгдэхүүн зарж, нийгмийн дундажаас дээгүүр түвшинд үйлчилнэ. Гэтэл иргэд өнөөдөр хүнс барааны захуудаар аль хямд бараа бүтээгдэхүүн хайж явна.

Баянголчуудын УИХ-д хоёр удаа сонгосон эрхэм түшээ чухам юу хийв гэхээр ямар нэгэн хариулт өгөх байх. Лавтай энэ дүүргийн иргэдийн амьдрал ахуйд эерэг мөрдөгдөх хууль санаачлан батлуулсангүй. Иргэдийн амьдрал сайжраагүйг дурдахын ч хэрэггүй. Уг нь Ж.Ганбаатараар Монголын төр, ард түмэн огтхон ч дутахгүй. Иргэн таны төлөө бус хөрөнгө, мөнгөө хамгаалж, өсгөхөөр их улс төрд хөл тавьсан хүнд удаа дараа итгэл дэвсэж, санал өгөхөө болих хэдийнээ иржээ.

С.Ууганбаяр