“Хариу нэхдэггүй буянтан” хүндэтгэлийн арга хэмжээ 4 дэх удаагаа Соёлын төв өргөөнд зохион байгуулагдлаа. Энэхүү арга хэмжээнд салбар бүрт ажил, амьдрал, хийж бүтээснээрээ бусдадаа үлгэр дууриал болсон тэргүүлэгч, манлайлагч 1300 гаруй эмэгтэйчүүдийн төлөөлөл оролцсон юм.

Арга хэмжээг нээж Нийслэлийн НАМЭХ-ийн тэргүүн, УИХ-ын гишүүн Б.Саранчимэг  “2021 онд Монгол улсын төрийн түүхэнд анх удаагаа 4 эмэгтэй Монгол төрийн сайдаар томилогдсон онцгой бас түүхэн үйл явдал болсныг онцлон хэлээд энэ үйл явдал нь Монголын мянга мянган эмэгтэйчүүд, ээжүүд, охид бүсгүйчүүдийн ирээдүйн эрх, тэгш боломжийн төлөө эв санааны нэгдлээр шийдэмгий, зоригтой хийсэн алхмын бодит үр дүн юм” гэлээ.

Мөн “Нийгэмд шударга ёсыг тогтоох, бэхжүүлэх, хүний эрх, эрх чөлөөг дээдэлсэн, тэгш байдлыг хангасан, ил тод, хүнд сурталгүй, хариуцлагатай, хүнлэг, энэрэнгүй бас тунгалаг Монгол төрийг цогцлооход охид, бүсгүйчүүд, эмэгтэйчүүд Та бидний дуу хоолой, зүрх сэтгэл, харилцан дэмжлэг, эв нэгдэл эрхэм чухал. Тиймээс шийдвэр гаргах түвшинд дэх эмэгтэйчүүдийн оролцоог нэмэгдүүлэхийн төлөө бүгдээрээ нэгдэн нийлж, нэгнээ дэмжиж, айл өрх бүрт хүртээмжтэй эдийн засгийн ногоон хөгжлийг эрчимжүүлж, үр хүүхдүүдийнхээ амьдрах эрүүл аюулгүй орчныг бүрдүүлж, өөрсдийн ажил хөдөлмөр эрхлэх боломж нөхцлийн төлөө дуу хоолойгоо нэгтгэцгээе гэж уриалж байна” гэв.