Хаанаа дагаад халагдагсдын дараагийн даргаар Гаалийн Ерөнхий газрын даргыг тодруулсан тухай сураг чих дэлслээ. Бригадын генерал Р.Отгонжаргалын тухайд хамтарсан Засгийн газрын үед Ерөнхий сайд зүгээс гаалийн удирдлагыг дотроос нь томилох нь авлигын үүр уурхайг шийдэж чадахгүй хэмээн үзэж, гаднын хүн томилох шийдвэрийг гаргасан гэж мэдэгдлийн дагуу Гаалийн ерөнхий газрын даргаар томилогдсон нэгэн.

Бригадын генерал Р.Отгонжаргал нь 1975 онд Говь-Алтай аймагт төрсөн. Хуульч, эрх зүйч мэргэжилтэй. Ямартай ч Гаалийн байгууллагын даргаар томилогдож үедээ өгсөн хөрөнгө оруулгын мэдүүлэгт жилийн орлого нь  нь 36 сая төгрөг байсан бол 2023 онд 94 сая болж өссөн гэх үзүүлэлт бий.  Гаалийн дарга болмогцоо жилийн орлого ийнхүү огцом сөсөн нь гаалийн байгууллагын ажилчид 2-3 жилийн дотор тэрбумтан болдог, авлига, хээл хахуулийн хэрэгт холбогддог, ачаанд шалгалт хийхдээ өөрсдөө хувьдаа завшдаг гэх мэт асуудлын нотолгоо мэт санагдаж хардлага төрүүлдэг нь нууц биш.  

Сонирхуулахад Р.Отгонжаргал нь Говь-Алтай аймгийн Чандмань сумынх бөгөөд Монголын үндэсний бөхийн холбооны тэргүүн Р.Нямдоржийн дүү юм билээ. Басхүү түүний төрсөн эгч Р.Бурмаатай холбоотой таагүй мэдээлэл ч сонсогддог. Тухайлбал, Замын-Үүдэд итгэмжлэгдсэн төлөөлөгч хийдэг иргэн Т.Нэргүй мөн л адил ажил хийдэг Р.Бурмааг гаалийн байцаагчдыг дарамталж иргэд зорчигчдоос мөнгө авдаг, бусад хүмүүсийн ачааг зогсоолгодог төдийгүй миний дүү Гаалийн Ерөнхий газрын дарга хэмээн “томордог”  хэмээн хэвлэлийн бага хурал хийж байсан удаатай.

Харин Р.Отгонжаргал уг мэдээллийг үгүйсгэж, Р.Бурмаа нь миний төрсөн эгч мөн. Эгч маань Замын-Үүдэд 20-иод жил хувиараа ажиллаж, амьдарч байгаа хүн.  Эгчийн ажил миний ажилтай ямар ч хамаагүй гэх тайлбарыг өгсөн байдаг. За ямартай ч ийм нэгэн дарга, ээлжит цэвэрлэгээнд өртөж, дараагийн ээлжийнхэн нь хоолондоо орохоор Засгийн газрын тэргүүнийг хормойдож байгааг дуулгая.

З.УРСГАЛ