Хааны алба халаатай, эзний алба ээлжтэй гэх үг бий. Гэхдээ энэ цагт хаанаа дагаад халагд гэдэг зарчим үйлчилдэг болсон. Хамтарсан Засгийн газрын сайд асан Л.Алтангэрэлийн багийг харьяа байгууллагуудаас нь хавчин шахаж хаях буюу гаргах ажиллагаа эхэлж байгаа бололтой. Хамж хаях давалгаанд хамгийн түрүүнд өртөх магадлалтай харьяа байгууллагын удирдлагуудыг Засгийн газрын хэрэгжүүлэгч агентлаг Гадаадын иргэн, харьяатын газрын дарга Н.Ууганбаяр түүчээлж байна.

Хурандаа Н.Ууганбаяр нь Цагдаагийн дээд сургуулийг 1997 онд төгссөн. Чингэлтэй дүүргийн Цагдаагийн хэлтэст эрүүгийн төлөөлөгч, Эрүүгийн цагдаагийн газарт төлөөлөгч, ахлах төлөөлөгч, Сонгинохайрхан дүүргийн Цагдаагийн хэлтэст Тасгийн дарга, Эрүүгийн цагдаагийн газарт тасаг, хэлтсийн дарга зэрэг албан тушаалыг хашиж байгаад 2012-2014 онд Эрүүгийн цагдаагийн газрын даргаар томилогдон ажиллаж байсан нэгэн.

Эрүүгийн цагдаагийн газрын даргаар ажиллаж байхдаа салбарын сайд асан УИХ-ын гишүүн Х.Тэмүүжингийн эсрэг ажиллагааг зохион байгуулсан гэх хэргээр албанаасаа чөлөөлөгдсөн хурандаа нарын нэг. Басхүү хотын дарга Х.Нямбаатарын холын ч билүү,  ойрын ч гэл үү хамаатан гэж дуулддаг. Товчхондоо Л.Оюун-Эрдэнийн хүн гэх тодотголд хамаатай учраас жийгдэх дарга нарын жагсаалтад  нэлээн дээгүүр бичигдсэн байх нь хэр.

Дараагийн нөхөр бол Хил хамгаалах ерөнхий газар /ХХЕГ/-ын дарга, бригадын генерал Ж.Бямбасүрэн. Тэрбээр тус газрын даргаар хоёр дахь удаагаа томилогдон ажиллаж байгаа бөгөөд Лаос улсад Элчин сайдаар сууж байгаад дуудагдан ирж,  албаа авсан нэгэн. Олны яриагаар түүнийг Ерөнхийлөгч асан Ц.Элбэгдоржийн хамаарал бүхий нэгэн гэх  сураг бий. Ямартай ч яам агентлагийн дарга нарыг халж солих ажиллагаанд О.Алтангэрэл сайд асны авчирсан хүн гэх үндэслэл голллож байгаа нь маргаангүй. Ташрамд сануулахад, Хууль зүй дотоод хэргийн сайдаар Ц.Нямдорж ажиллаж байхдаа буюу 2019 онд Ж.Бямбасүрэнг Хил хамгаалах ерөнхий газрын даргад санал болгон, томилуулж байсан билээ.

 Х.ХЭРЛЭН