Цагдаагийн ерөнхий газрын Эрүүгийн цагдаагийн газраас өчигдөр Баянгол зочид буудалд байрладаг “ХКҮ” болон "Мах Импекс" компанийн байранд нэгжлэг, шалгалт хийсэн. Үүнтэй холбогдуулан өнөөдөр Эрүүгийн цагдаагийн газраас мэдээлэл хийлээ.

ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүү "ХКҮ, "DMCP" компанид МХЕГ-аас Зөрчлийн хэрэг нээж шалгасан. Улмаар гэмт хэргийн шинжтэй байж болзошгүй байна хэмээн Нийслэлийн Прокурорын байгууллагад хэргийг шилжүүлж, УЕПГ-аас ЭЦГ шалгах харъяалал тогтоосон. МХЕГ болон Эрүүгийн цагдаагийн газрын шалгалтаар,  

"DMCP" компани бол БНХАУ-ын иргэний өмч. Тухайн компани нь БНХАУ руу мах экспортлох зөвшөөрөлгүй. Тус компанийн агуулахад дулааны аргаар боловсруулсан болон боловсруулаагүй хонь, ямааны нийт 234,8 тонн мах байсан. 

Дулааны аргаар боловсруулсан ХКҮ компанийн хаяг, шошготой 4842 хайрцаг буюу 96 тонн мах илэрсэн. Хаяггүй ямааны мах 4692 хайрцаг буюу 92 тонн, ямааны шулсан мах 7,9 тонн мах байсныг битүүмжилсэн. ЭЦГ-аас нэгжлэг хийсэн дээр тайлбар хийхэд,  "DMCP" компанийн агуулахад  Дулааны аргаар боловсруулсан ХКҮ компанийн хаяг, шошготой 4842 хайрцаг буюу 96 тонн мах илэрсэн нь шалгах үндэслэл болсон. Тиймээс таван газар прокурорын зөвшөөрөлтэйгөөр нэгжлэг хийсэн. 

Мах экспортлох зөвшөөрөлтэй ХКҮ компани зөвшөөрөлгүй "DMCP" компаниар мах бэлтгүүлсэн байна уу, эсвэл "DMCP" компани "ХКҮ" -ийн хаяг, шошгыг хууль бусаар ашигласан байна уу гэдгийг тогтооно" гэх мэдээллийг өглөө.

Ташрамд сануулахад, “Эм ди си пи” компанийн Эмээлт дэх үйлдвэрийн байрнаас олдсон өмхий махан дундаас “ХКҮ”,  “Мах Импекс” ХХК-ийн шошго их хэмжээгээр олдсон байдаг. “ХКҮ”, “Мах Импекс” хоёр компани нь дата бүртгэл дээр нэг хаяган дээр байршдаг, Ерөнхийлөгч асан Х.Баттулгад шууд хамааралтай бизнесүүд юм. Тодорхой хэлбэл, "ХКҮ" ХХК-ийг Ерөнхийлөгч асан Х.Баттулгын төрсөн эгч Х.Цэндбаяр 100 хувь эзэмшдэг бол "Мах-Импекс" ХК нь төрсөн дүү Х.Баттуулынх. Тус компаниудын зүгээс “Эм ди си пи” компанийн байрнаас илэрсэн шошгын асуудлаар шалгуулахаар хуулийн байгууллагад хандсан билээ.

Харин ЦЕГ-аас өгсөн мэдээллээс үзэхэд Ерөнхийлөгч асан Х.Баттулгын хамаарал бүхий Монголын компаниудын хаяг, шошгыг БНХАУ-ын иргэний өмч гэж буй  “Эм ди си пи” компани хууль бусаар ашигласан эсэх нь хуулийн байгууллагын шалгалтаар тогтоогдох нь ээ.