Г.Занданшатарын Засаг бүтэц бүрэлдэхүүнээ зарлаж, замбараагүй их ажил хүлээж байгаа учраас яаравчлая гэх уриан доор өчигдөр анхны хуралдаанаа хийлээ. Хэл ам, хэрүүл тэмцэл доор багаа бүрдүүлсэн засгийн тэргүүн, бодож байж л гар нийлэн ажиллах хүмүүсээ сонгосон байх гэх мухар найдвараас илүүтэй заяа нь мэдээд, нэрээ хичээх хүн олон байгаасай л гэж залбирч байснаа нуух юун.

Монгол Улсын 34 дэхь Засгийн газарт онцгойрч сондгойрон олны ханхаарлыг татаж буй нэг эрхэм бий нь үндэсний цөөнхийн төлөөлөл болох УИХ-ын гишүүн Т.Аубакир. Сэлэнгийн унаган хүү тэрбээр УИХ-д Баян-Өлгийчүүдийг төлөөлөн хоёронтоо сонгогдсон. Тэрбээр Сэлэнгэ аймгийн Цагаан нуур суманд төрж, өссөн бөгөөд түүний аав Тилеухан нь Баян-Өлгий аймгаас илгээлт өвөртлөн очсон казах үндэстний нэг.

Өмнөх парламентын гишүүд ЖДҮ, БЗС, нүүрс зэргийг бөөнөөрөө тонон дээрэмдэж, ар араасаа хуулийн байгууллагын хаалга татаж, эхнээсээ ялын тогтоолоо уншуулж явахад ямар ч сан, нүүрстэй холбогдолгүй нэр нь цэвэр үлдсэн цөөн нөхдийн нэг нь Т.Аубакир.

Сэлэнгийн эрэгт өсөж торнисон түүнийг “Сэлэнгэ тариа” ХХК-ийн дэд захирал, “Тариан цацал” ХХК-ийн захирлаар ажиллаж байхдаа хөрөнгийн эх сууриа босгож, бизнесийн салбарт өөрийнхөөрөө оршин сууриа тавьсан гэх юм билээ. Тиймдээ ч төрөөс төрсөн тэрбумтнуудаас тэс өөр намтар түүнийх байдагт гайхах зүйлгүй.  Эрхзүйч мэргэжилтэй тэрбээр Баян-Өлгий аймгийн НАМЗХ-ны даргаар ажиллаж эхэлснээс инагш нийтийн нийгмийн төрийн ажлын гараа нь эхэлсэн гэдэг.

Т.Аубакир Монгол Улсын 34 дэхь Засгийн газарт Гэр бүл, нийгмийн сайдын албыг хашина. Монгол Улсын Засгийн газарт сайдын алба хашиж буй гурав дахь казак үндэстэн хэмээгдэн түүхэнд бичигдэнэ.

Хамгийн анхны үндэсний цөөнхийн төлөөлөл болж төрийн сайдаар ажилласан хүн бол Р.Сандалхан. Монгол Улсын гавьяат тээвэрчин  тэрбээр Зам тээвэр холбооны сайдаар ажиллаж байх үе Монгол Улс зах зээлийн харилцаанд шилжиж, өөрчлөлт шинэчлэлт явагдаж байсан цаг мөчтэй давхацдаг. Тухайн үед Холбооны яамыг татан буулгаж, Зам, тээвэр, холбооны яам нэртэйгээр 1992 онд байгуулж, сайдаар нь Р.Сандалханыг томилж байжээ.

Р.Сандалхан сайд харилцаа холбооны салбарыг удирдан ажилласан хугацаандаа салбарын мэргэжлийн боловсон хүчнүүдийн санаа бодол, үйл ажиллагаанд тулгуурлан, цахилгаан холбооны салбарыг хувьчлах анхны алхмыг хийж, Монгол шуудан компанийг үүсгэн байгуулж, Монгол Улсын “Харилцаа холбооны тухай” хуулийг УИХ-аар батлуулан, салбарын хууль, эрх зүйн орчныг бүрдүүлсэн байдаг юм.

Харин дараах төлөөлөл бол одоогийн Ерөнхийлөгч У.Хүрэлсүхийн багт ажилласан. Тодруулбал, Барилга хот байгуулалтын сайд Х.Баделхан. Түүний үед  нийслэлчүүдийн амин чухал асуудал болсон, олон жил шийдлээ хүлээж байгаа Төв цэвэрлэх байгууламжийг шинэчлэгдсэн. Мөн 21 аймгийн цэвэрлэх байгууламжийг шинэчлэх ажил эхлэлээ тавьсан нь үнэн.  Басхүү Барилга, хот байгуулалтын сайдын 2017 оны арванхоёрдугаар сарын 28-ны 216 дугаар тушаалаар гэрээний үндсэн дээр тусгай зөвшөөрөл олгох үйл ажиллагааг холбогдох хууль, журмын хүрээнд хэрэгжүүлснээр цүнхний гэгдэх  компаниуд алга болж, төрийн хүнд суртал ч арилж, үйлчилгээний шуурхай байдал сайжирсан гэх сайшаалыг салбарынхан нь хэлдэг.

Монголчууд гурвын тоог билэгшээдэг. Цөөнхийн төлөөлөл болсон Т.Аубакир сайд,   Р.Сандалхан гуайн хэлсэнчлэн “Түмэн олныхоо итгэлийг алдалгүй ажилласны үр дүн юм даа. Хэрэв худалч, хулгайч нөхөр байсан бол юу гэж намайг Баян-Өлгийнхөн гурван удаа Их хуралд суулгахав дээ” гэж хэлснийг санан сайн аижллах биз ээ Бас ч гэж төрийн түшээгээр хоёронтоо сонгогдохдоо мэдээлэлд ойр байдлаа ашиглан, шударга бусын хонгилоор алхалгүй өнөөдрийг хүрсэн эл эрхэмд Монгол Улсын нийт иргэдийн 10 хувийг эзэлдэг казахуудаас гадна нийт Монгол Улсын иргэд итгэж найдаж буйг сануулахад илүүдэх юун. Нэр цэвэр бол төр цэвэр гэдэг дээ.