Шинээр Засгийн газар байгуулагдаж, гүйцэтгэх засаглалын тэргүүн Г.Занданшатар “Шинэ Засгийн газар хууль хэрэгжүүлэх, хуулийн үйлчлэлийг тэгш байлгах, шударга ёс, тэгш эрхийг хангахад бүхий л анхаарлаа хандуулна. Мөн төрд ёс зүйг сахиулах нь Засгийн газрын эн тэргүүний зорилт байх болно” хэмээн УИХ-ын чуулганы индэр дээрээс хэлнэ лээ.

Тэгвэл Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд “Аймаг, нийслэл, сумын хурлын төлөөлөгч нь тухайн засаг захиргаа, нутаг дэвсгэрийн нэгжид байнга оршин суугч байна” хэмээн заасан байтал Хэнтийн аймгийн ИТХ-ын төлөөлөгч Х.Ганчулуун гэх нөхөр Багануур зүүн өмнөд бүсийн цахилгаан түгээх сүлжээний гүйцэтгэх захирлаар ажиллаж байна. Урьд өмнөх Засгийн газар хаана ямар хууль хэрэгжүүлсэн болоод орон нутгийн төлөөлөгчийг нийслэлд авчирч ажиллуулсан хэрэг вэ. Ядахад салбарын сайд Б.Чойжилсүрэн нь үүнийг мэдээгүй хэрэг үү.

Өнөөдөр Ерөнхий сайд Г.Занданшатар таны танхимд Б.Чойжилсүрэн гэх нөхөр Эрчим хүчний сайдаар улиран ажиллахаар болжээ. Танхимынхаа тэргүүний хууль сахиулах тэргүүн зорилгын дээгүүр алхаж байгаа сайддаа сануулга өгөхгүй бол Х.Ганчулуун мэтийн нөхөд ч хууль зөрчин ажилласаар байх болно.

Энгийнээр бодоход аймгийн ИТХ-д орон нутгийн иргэдээ төлөөлнө гэж суучихаад яахаараа хот суурин бараадаж, хурган даргын сэнтий дамжиж явдаг юм. Хийх ёстойгоо л хийх ёстой биз дээ.

Мөн Авлигатай тэмцэх үндэсний хөтөлбөрт “Төрийн жинхэнэ албан хаагчийг томилох, чөлөөлөх асуудлыг төрийн өндөр албан тушаалтан болон улс төрийн намын нөлөөллөөс ангид байлгах”-аар заасан ч ИТХ-ын төлөөлөгчийг төрийн албанд томилж байгаа нь жинхэнэ улстөржилтийг бий болгодог.

Урьд өмнө Төрийн албаны тухай хуулийн 15.1.8-д “аймаг, нийслэл, сум, дүүргийн иргэдийн Төлөөлөгчдийн Хурлын төлөөлөгчөөр сонгогдох, аж ахуйн нэгж, нам, олон нийтийн бусад байгууллагад орон тооны албан тушаал хавсран гүйцэтгэхийг хориглоно” гэсэн байдаг ч өөрчлөлтөөр квот тогтоож өгсөн. Гэхдээ орон нутгийн төлөөлөгч нийслэл буюу өөр аймаг, сум дүүрэгт төрийн алба хашина гэх эрх зүйн орчин огт байхгүй. Тэгэхээр Х.Ганчулуун хэмээх нөхөр чухам яагаад Монгол Улсын хуулийн дээгүүр алхаад явааг тодруулах гээд үзье.

Мэдээж хэрэг, тэр бол өчигдөрхөн бүхний эзэн явсан Ерөнхий сайд Л.Оюун-Эрдэнийн шууд татаасаар хуулийн дээгүүр яваад ирчихсэн хүн. Тэгээд ч хүний шуналд хязгаар үгүй. Гагцхүү үүнийг тэвчиж чадахгүй бол хаа нэг газрын мухарт, эсвэл харанхуйн дунд аваачих нь бий. Тэгвэл Хэнтийн аймгийн иргэдийн төлөө зүтгэнэ, Нутгийн өөрөө удирдах байгууллагад та нарыгаа төлөөлнө хэмээн 2020, 2016 онд тэдний итгэлийг авсан Х.Ганчулуун хэмээх нөхөр нутгийнхаа хоолыг чамлан, Улаанбаатар руу гүйсэн түүхтэй.

Тэрбээр өнгөрөгч 2021 онд Ерөнхий сайд асан Л.Оюун-Эрдэнийн дэмжлэгээр “Улаанбаатар цахилгаан түгээх сүлжээ” төрийн өмчит компанийн Тэргүүн дэд захирлаар томилогдон хотод ирж байв. Харин 2022 онд Төрийн хэмнэлтийн тухай хууль батлагдаж, төрийн өмчит компаниудын дэд захирлуудыг чөлөөлөхөд Х.Ганчулуун “Улаанбаатар цахилгаан түгээх сүлжээ” компанийн Хангах үйл ажиллагааны бодлого хэрэгжилтийн хэлтсийн даргаар үлдсэн зэргээс харахад хөдөөгийн нэг төлөөлөгчид ахадсан аахарал байв.

Энэ нөхрийг Хэнтийн аймгийн төлөөлөгч гэж чамлаж болохгүй. Тэр уг албаараа дамжуулан өөрийн хамаарал бүхий “Ар хөв энерги” компанийн нэр дээр арваад тендер “гулсуулчихсан” зайтай эр гэдэг. Энэ компани мэдээж түүний нэр дээр биш, эхнэр Б.Баяржавхлангийн нэр дээр бий. Одоо тэр Багануур зүүн өмнөд бүсийн цахилгаан түгээх сүлжээний гүйцэтгэх захирал болчихсон “томорч” явна. Хотоос алслагдмал дүүрэгт “зүүн өмнөд” бүсийн гэх өргөн цар хүрээтэй байгууллагаар дамжуулан чухам юу хийж суугааг мэдэх юм алга. Ер нь бол Х.Ганчулууны энэ үйлдэл бол анхнаасаа л хууль зөрчсөн бол цаашид ч ийн зөрчигдсөөр байхыг л харуулсан явдал. Шинэ Засгийн газар энэ бүхнээ цэвэрлэж явахгүй бол дараа дараагийн үйлд чинь сөрөг нөлөөлөх бөгөөд нас чинь богино байна гэсэн үг.