МАН-ын Удирдах зөвлөл хуралдаж, Ерөнхий сайд Г.Занданшатарын Засгийн газраа байгуулах хүрээнд барьж байгаа саналыг хэлэлцэн дэмжсэн байна. Тодруулбал, Ерөнхий сайд Г.Занданшатар УИХ-д суудалтай намуудаас АН-аас  бусадтай нь хамтран Засгийн газраа байгуулж, Л.Оюун-Эрдэнийн танхимд ажиллаж байсан зарим сайд нарыг шинэ танхимын сайдаар томилуулах, Засгийн газрын бүтэц бүрэлдэхүүний тухай хуульд өөрчлөлт оруулахгүй, хэвээр нь УИХ-д өргөн барина. Гэхдээ Үндэсний хороодыг удирдаж байгаа сайд нарыг хасна гэдэг мэдээллийг өгчээ.

УЗ-ийн мэдээллийг МАН-ын ерөнхий нарийн бичгийн дарга Я.Содбаатар өгсөн юм.  Тэрбээр “Монгол Улсын Үндсэн хуулиар олгогдсон Ерөнхий сайдын бүрэн эрхийг хүндэтгэж дэмжлээ. Ерөнхий сайд хэд, хэдэн зарчмын зүйлийг хэлсэн. Тухайлбал дэлхий нийтийн нөхцөл байдалтай холбоотойгоор Монголд нөлөөлж байгаа эдийн засгийн хүндрэл бэрхшээл, экспортод гарч байгаа хүндрэлийн асуудал. Түүнчлэн  төсөв, нийгэм эдийн засгийн амьдрал дээр ирж байгаа хүндрэлийг ярьж, парламентад суудалтай намуудтайгаа хамтарч, монголчууд бид энэ цаг үед нэгдсэн бодлоготой байж, хүнд цагийг хамтдаа туулах нь зүйтэй гэж саналаа хэлсэн. Энэ дагуу МАН-ын Бага хурлын зургадугаар хуралдаанаас гаргасан шийдвэрийн дагуу өмнө нь хамтарч ажиллаж байгаад гэрээг зөрчсөнөөс  бусад намуудтай Засгийн газраа байгуулж болох талаар чиглэлийг Ерөнхий сайдад өглөө.

Ерөнхий сайд энэ удаагийн Засгийн газрыг байгуулахдаа Засгийн газрын бүтэц бүрэлдэхүүний тухай хуульд өөрчлөлт оруулахгүй, өнөөдрийнхөөрөө аваад явъя. Одоо орж ирэх төсвийн тодотголтой хамт бүтэц бүрэлдэхүүний өөрчлөлт хийгээд явна. Тийм учраас Үндэсний хороодыг ахалж байсан сайд нарыг томилохгүй явахаар шийдвэр гаргасан. Нэг ёсны энэ сайд нарын орон тоо хасагдана гэсэн үг" гэлээ.

Мөн тэрбээр жендэрийн харьцааг асуусан сэтгүүлчид, нэг ч эмэгтэй сайдгүй Засгийн газар ч байсан удаатай. Харин АН-ын гэрээ зөрчсөн тухай асуудлыг өнгөрсөн хоёрдугаар сард мэдэгдэж байсныг АН-ынхан мартаагүй байх гэх хариултыг өгсөн юм.