Улс ардын Ухаа худгаас улбаатай улс төржилт гэх ойлголт бол угаасаа буруу. Ах намын ах дүүсийн үл ойлголцол, аль эсвэл зөрчилдөөн аль өвөл л тодорхой болчихсон байсан. Улстөрчдийг угждаг томоохон компаниудаас татгалзлаа гэх хамтарсан Засгийн газрын мэдэгдэл эл зөрчилдөөний эхийг тавьж, дөлийг бадраасан хэрэг л дээ.

Алдаа гаргаж, овоо босгоогүй бол нам нууж, хав дардгаараа алдартай МАН-ын дотоод бүлэглэлийн зөрчилдөөн ахиад хэр удаан үргэлжлэх байсныг таашгүй. Гэвч нэгэнт асуудал хяналтаас гарч, хамтарсан Засгийн газраас АН-ыг гаргах чиглэлийг Бага хурлаасаа өгч,  итгэл үзүүлэх хүсэлтийг нь энэ улсын нэгдүгээр хүн орж ирээд самарчихсан тохиолдолд зогсолтгүй урагшлах ёстой төрийн алба л өрөвдмөөр байна. Төрийн мэргэшсэн албан хаагчид ч гайхаж хүлээнгээ гацааг  гаргах эрх мэдэлтнүүдийг “гялалзаасай” хэмээн залбирч байна, ханцуйндаа...

Засгаа хурдан байгуулж, зам мөрөө тэгшитгэн, улс орноо урагшлуулж, амар түвшин амьдруулахсан гэх сэтгэлтэй нэг ч улстөрч ордонд ч, ордны гадна ч алга. Яг үнэндээ яам, агентлагуудад ажил хийж байгаа дарга алга. Сайд нь огцрох сургаар дарга нар нь алга болж, тамга тэмдэг дарах ёстой ажлууд нь царцаж орхив. Зах зээлийн мэдээллээс харахад, Засгийн газрын олон улсад гаргасан бондуудын үнэ ханш ч гэрлийн хурдаас арай бага хурдаар унаж эхэлсэн сурагтай.

Харин манайхан Ерөнхий сайдаа Ерөнхийлөгчийн үгэнд орж томилсон шигээ, шуурхайлахгүй байна. Томилолтоо авах гэж шөнөжингөө байцаалгасан Г.Занданшатар Ерөнхий сайдад танхимаа өөрийн хүсэл сонирхлоор байгуулах боломж ч олдохгүй нь. Олдохгүй нь ойлгомжтой байсан л даа...    

Одоо харин нэгэнт хөөсөн найман сайдынхаа орны хүнийг олж, ажлаа амжуулахгүй бол наадмын маргааш намар болчих гээд байна. Засгаа хамтарсан эвсэн байдлаар байгуулахгүй бол зам мөр нь барцад саад ихтэй байхыг эрхбиш мэдэж байгаа байх. Басхүү хамтарсан Засгийн газарт хангалттай ажилласан сайд нараа халж солилгүй урагшлах шаардлага ч бас байна. Олны зүгээс Б.Дэлгэрсайхан, С.Бямбацогт, Б.Жавхлан, Б.Чойжилсүрэн, Н.Учрал, Б.Батцэцэг, С.Амарсайхан нарыг үлдэх магадлалтай гэх таамаг дэвшүүлж буйг ч бас дуулгая.