Өнгөрөгч 2023 онд Баянгол дүүргийн Засаг даргаар ажиллаж байсан Ө.Сумъяабаатарыг огцруулсан ч УИХ-ын гишүүн Ж.Ганбаатар нар хөөцөлдөж байж эргэн томилуулсан. Тиймдээ ч өнөөдөр Баянгол дүүргийн Засаг даргын Тамгын газар, тус дүүрэгт хамаарах Төрийн өмчит байгууллагууд нь Ж.Ганбаатарын тавиулуудаар дүүрсэн хэрэг.

Уг нь ах намынхан түүнд итгэл үзүүлж, өнгөрөгч 2024 оны сонгуулиар мандат өгсөн ч Ж.Ганбаатар эзнийхээ өмнө бөхөлзсөөр байгаад уначихсан. Гэтэл найдвартай нэг мандат шороодсон Ө.Сумъяабаатарыг дахин Засаг даргаар ажилуулж байгаагийн цаана Ж.Ганбаатар бий. Түүнээс бус сонгуульд өвдөг шороодсон нөхөр бол хариуцлагын хүрээнд ажлаа өгчихсөн байх ёстой.

Энэ утгаараа тэр Баянгол дүүргийн хэмжээнд ч тэр нийслэлийн хэмжээнд ч тэр иргэдээ бус Ж.Ганбаатарыг төлөөлөн ажилладаг. Баянгол дүүргийн иргэд ч Засаг даргыгаа Ж.Ганбаатарын бие төлөөлөгч юм уу, манай дүүргийн Засаг дарга юм уу ойлгохоо болилоо хэмээн ярилцах болжээ.

Мөн манай дүүргийн Засаг дарга Ө.Сумъяабаатар юм уу, Ж.Ганбаатар юм уу гэх ч яриа гарчээ. Ийм бусдын утсан хүүхэлдэй болсон Засаг даргатай дүүрэг хөгжиж дэвших, амьжиргааны тухай ярихын ч хэрэггүй биз.

Баянгол бас чиг жишиг дүүрэг тулдаа өдий зэрэгтэй яваа болохоос бус өмнөхөөсөө уруудсаар байгааг нүдэтэй нь харж, чихтэй нь сонсож буй.

Олны хэл ам, шүүмжлэл тасрахгүй байгаа учир Ө.Сумъяабаатараас залхсан МАН-ынхан дээрээ ч, доороо ч түүнийг огцруулах ажиллагааг эхлүүлсэн байна. Үүнийг НИТХ-ын дарга А.Баяр, Засаг дарга Х.Нямбаатар нар ч дэмжиж байгаа аж.

Тэгэхээр хэн гэдэг нөхөр Баянгол дүүргийг сонирхоод эхлэв гэдэг таамаг бонусанд нь дагалдах нь мэдээжийн хэрэг. Эх сурвалжийн хэлж байгаагаар бол НИТХ-д Баянгол дүүргээс ажиллаж байгаа Д.Ихбаяр гэгч нөхрийг акулууд тавихаар зүтгэж байгаа бололтой. Ө.Сумъяабаатарын хувьд бол огцрох боломжоо хангачихсан нөхөр. Архангайн гаралтай түүнийг анх улс төрд УИХ-ын гишүүн асан Ж.Мөнхбат өөд нь татан гаргаж ирсэн. Одоо бол Ж.Мөнхбатын хувьд юун өөрийгөө яая гэж яваа нэгэн. Тэгэхээр Ө.Сумъяабаатарын хувьд Ж.Ганбаатарыг дагах болсон ч эзэндээ таалагдахаа больсон хэрэг.