УИХ-ын гишүүн Э.Болормааг УИХ-ын ээлжит сонгуулиар хоёрдугаар тойрог буюу баруун бүсэд нэр дэвших үедээ "Ханбогд Эксплорайшн" гэх гадаадын хөрөнгө оруулалттай компаниас 30 сая төгрөгийн хандив хууль бусаар авсан нь гэх мэдээлэл түгээд багагүй хугацаа өнгөрсөн.

Тодруулбал, УИХ-ын гишүүн Э.Болормаа 2024 оны УИХ-ын сонгуулийн үеэр гадаадын хөрөнгө оруулалттай “Ханбогд эксплорэйшн” ХХК-аас 30 сая төгрөгийн хандив авсан байдаг. Хуулиараа гадаадын хөрөнгө оруулалттай хуулийн этгээдээс хандив авах хориотой. Тиймээс түүнийг шалгаж эхэлсэн гэх сураг бий ч хэргийн харьяалал нь Ховд аймаг руу шилжээд зогсохгүй сунжирч байгаа хэмээн хуульч Б.Мэргэн мэдэгдэж байсан билээ.

Басхүү “Э.Болормаа гишүүний 30 сая төгрөгийн хандив авсан “Ханбогд эксплорэйшн” ХХК нь түүний сонгогдсон тойрог болох Завхан аймагт хоёр ширхэг хайгуулын тусгай зөвшөөрөл эзэмшдэг. Нэг тусгай зөвшөөрөл нь сонгуулийн дараа буюу 2024 оны 10 сард хугацаа дууссан ч сунгагдсан гэх мэдээлэл бий.

Нөгөөтэйгүүр Э.Болормаагийн холбогдсон хэргийн хөөн хэлэлцэх хугацаа дуусах дөхөж байсан ч  хэргийн хөөн хэлэлцэх хугацаа дууссан гэх шалтгаанаар хааж магадгүй гэх хардлага газар авсан ч цагдаагийн газраас түүнийг шалгаж эхэлсэн гэж мэдэгдсэн. Гэхдээ яг ямар асуудлаар гэдгээ хэлэх боломжгүй гэсэн. Ямартай ч түүнд холбогдох хэргийг прокурорт шилжүүлсэн гэх мэдээлэл түгэж, уг мэдээлэлтэй зэрэгцэн Эрүүгийн хуулийн 19.2 дугаар зүйлийн 1 дэх хэсэг буюу Төрийн эрх мэдлийг хууль бусаар авах, саатуулах гэх зүйл ангиар шалгаж байгаа гэх сураг сошиал орчинд бичигдэх болсон. Уг нь түүнийг Сонгуулийн тухай хуулийн 56.1-ийн нэгд заасанчлан гадаад улс буюу гадаадын байгууллага, олон улсын байгууллага, гадаадын хөрөнгө оруулалттай байгууллага, төрийн болон нутгийн өөрөө удирдах байгууллага хандив өргөхийг хориглоно гэх заалтыг зөрчсөн гэж гомдол гаргасан байдаг.

Одоогоор Э.Болормаагийн бүрэн эрхийг цуцлуулах санал прокуророос гаргаагүй байгаа ч сонгуулийн зардалд нь аудит хийсэн "Нийслэл аудит" ХХК-ийн эрхийг нь цуцалжээ. Үүнтэй зэрэгцэн улс төрийн хүрээнд Х.Болормаа гишүүний бүрэн эрхийг цуцалж хариуцлаг хүлээлгээд оронд нь УИХ-ын гишүүн Ц.Цэрэнпунцагийг “авчрах” тохиргоо хийгдсэн гэх бор шувуу нисэж эхэллээ.

З.Урсгал