Төрийн байгуулалтын байнгын хорооны хуралдаанаар Ерөнхий сайдыг томилох тухай асуудлыг хэлэлцэн санал хураалт явуулж, Ерөнхий сайдад Г.Занданшатарыг томилохыг 84.2 хувиар дэмжсэн. Хуралдааны үеэр УИХ-ын гишүүдийн асуултад хэрхэн хариулсныг тоймлон хүргэе.

“Үндсэн хуулийн нэмэлт өөрчлөлтийг хэрэгжүүлэхийн тулд нэр дэвшиж байна. Дэлхийн улс орны нөхцөл байдал, эдийн засаг ийм хүнд нөхцөлд МАН-аас итгэл үзүүлж байхад хойш суух эрх надад байхгүй. Ингэж бидэнд сургасан. Ажлын туршлага таарч байна. МАН-ын Бага хурал дотоод ардчилалтай болсон. Өнөөгийн нөхцөл байдал хүнд байхад дотооддоо бид эв нэгдэлтэй ажиллах ёстой. Улс орныхоо эрх ашгийг эхэнд тавих ёстой. Засгийн газрын хараат бус байдлыг хангах ёстой. Бид ингэж байж хүнд цаг үеийг давна.

Ер нь Засгийн газрын кабинетын зарчим алдагдаж байсан цаг үе олон байсан. Бид арагшаа бус урагшаа харж ажиллана. Элдэв тоо хэлж, ард иргэдэд хүлээлт үүсгэмээргүй байна. Бид урагшаа харж ажиллах ёстой. УИХ-аар шөнөжин хуралдаж шийдвэр гаргасныг би дүгнэхгүй. Хамтарсан Засгийн газар богино хугацаанд сайн ажилласан. Тийм учраас ажлууд нь үргэлжлэх ёстой. Би бусад намуудтай уулзаж ярилцаагүй. Намайг Ерөнхий сайдаар томилоогүй байна. Хэрвээ томилбол УИХ-д суудалтай намуудтай улсынхаа эрх ашгийн төлөө хамтарч ажиллана.

Одоо тансаг хэрэглээний татвар нэмэх замаар татварын ачааллыг бууруулах өөрчлөлтийг ярьж байна. Гэхдээ НӨАТ бол бусад татвартай уялдаж, төр бүсээ чангалж, хэт өндөр үнэтэй машин, орон сууцны татвар нийгмийн дундаж давхаргыг дэмжих хөшүүрэг байдаг учраас татварын шинэчлэлд анхаарна. Хуурамч шатахуун гэлтгүй бүх хуурамч зүйлтэй тэмцэх ёстой. Ажил олгогч, баялаг бүтээгчдийг дэмжиж байж эдийн засаг сэргэнэ. Тэгж байж халамжаас хөдөлмөрт зэрэг гоё сайхан уриа ажил болно. ”  хэмээн хэллээ.