Өчигдөр МАН-ын Бага хурлаар Ерөнхийлөгчийн Тамгын газрын дарга Г.Занданшатарыг дараагийн Ерөнхий сайдад нэр дэвшүүлсэн. Харин өнөөдөр  Ерөнхий сайдад нэр дэвшигчийн нэрийг Ерөнхийлөгчид хүргүүлнэ. Ерөнхийлөгч УИХ-д өргөн мэдүүлсний дараагаар УИХ-ын гишүүд санал хурааж, Ерөнхий сайдыг томилно. Эцэст нь энэ улс орон маань Ерөнхий сайдтай болно. Ерөнхий сайд маань багаа бүрдүүлнэ. Багт нь орох баагийнуудын нэрсийг бас л ил далд зөвшилцөнө. Хэнтэй гэж үү?

Монгол Улсын Ерөнхийлөгч У.Хүрэлсүхтэй зөвшилцөнө шүү дээ. Тэр угаас Хүүкийн хүн. Тэр гишүүн болсноосоо инагш үргэлж л одоогийн Ерөнхийлөгчийн ойрын хүнд тооцогддог байсан. УИХ-ын гишүүн байхад нь У.Хүрэлсүх л мотордож байж, УИХ-ын дарга болгосон. УИХ-д нэр дэвшээд, Архангай, Өвөрхангай, Баянхонгор аймгийн иргэд хэрэггүй ээ гээд сонгоогүй байхад нь дэргэдээ шадарлуулж, Ерөнхийлөгчийн Тамгын газрын даргаар тавьсан. Өчигдөр Ерөнхий сайдад нэр дэвших болсон, МАН-ын Бага хурлаас дэмжлэг авсных нь цаад учгийг нь мэдээж манай улсын маань номер нэг эрхэм эмхэрдээд сууж байгаа.

Ямартай ч намынхаа VII Бага хурлаас Ерөнхий сайдад томилогдох эрхийн бичиг өвөртөлсөн эл эрхэмд намын гишүүд нь, бүх ард түмний эв нэгдлийг хангаж, намын гишүүд болон парламентад суудалтай намуудын итгэлийг хүлээж, хамтраарай, хамгийн гол нь эдийн засгийн мэдлэг, мэдрэмжтэй ажиллаарай гэж хүссэн. Бас захисан. Үнэндээ энэ цаг үед Ерөнхий сайд болох хүн эхлээд нам дотроо дараа нь парламентад суудалтай намуудтай учраа ололцдог байж гэмээнэ эдийн засгийн хүнд нөхцөл, тулгарсан хүндрэлийг давж гарч таарна. Гэхдээ л Г.Занданшатарыг хүний хувьд дажгүй ч өөрийн толгойгүй Хүүк ахыннхаа аясаар л хөдлөх байх гэсэн таагүй таамаг хөвөрсөөр буйг дуулгах нь зүйтэй.

Нөгөөтэйгүүр Г.Занданшатарыг Засгийн газраа хэрхэн бүрдүүлэх бол хэмээн хоолонд орчих ээлжээ болсон гэж үзэгсэд цөөнгүй бийг хүлээн зөвшөөөрөх нь зөв байх. Эвслийн засаг, эс бөгөөс гэхчлэн олон хувилбар яригдаж л байна. Угтаа МАН дангаараа засгийн эрхээ аваад, ямбаа эдлээд, ялаа үүрээд явсан нь дээр гэх санаа нийгмийн зүгээс нилээд хүчтэй яригдаж буйг бас дуулгачихая. Мэдээж төрийн өмчит компаниудыг нээлттэй засаглалд шилжүүлж, төсвийн бүтцийг багасган эмхэлж, яамдын тоог бууруулах хүсэлт ч бий.

Нэгэнт Бага хурлын шийдвэр гарсан учраас  Ерөнхий сайдад нэр дэвшигчийн нэр Ерөнхийлөгчид хүргэгдэж байгаа байх.  Ерөнхийлөгч 34 дэх Ерөнхий сайдын нэрийг УИХ-аар томилуулах санал оруулна. УИХ нийт 126 гишүүнээс бүрддэг. Мэдээж,  нийт гишүүдийн олонхи нь дэмжсэн тохиолдолд Г.Зандашатарын бүрэн эрх хэрэгжиж эхлэх учиртай. Өөрөөр хэлбэл, Г.Занданшатарт УИХ-ын 126 гишүүнээс хамгийн багадаа 64 дэмжсэн санал хэрэгтэй гэсэн үг.

МАН-ын хувьд энэ удаагийн парламентад 68 суудал авсандаа эрдэн баараггүй гарна гэж бат итгэлтэй суугаа байх. Санал хураалтыг илээр явуулбал, нөхцөл байдал хүссэнээр үргэлжилж, хяналтаас гарахгүй. Намын бодлоготой тэрсэлдсэн энэ тэр гээд ял зэмд унах учраас гараа хүссэн хүсээгүй өргөж л таарна.

Харин далд  буюу нууцаар хураавал байдал эвгүйтэх магадлал бий. Бага хурал дээр Г.Тэмүүлэнг дэмжигсэд удирдагчийн үгнээс зөрвөл байдал өөрөөр эргэнэ. АН-ын 42, ХҮН намын 8, Үндэсний эвслий 4, Иргэний зориг ногоон намын 4-н гишүүн  гээд 58 гишүүн дээр МАН-ын 10 гишүүн л эсрэг санал өгчихвөл Г.Занданшатарын Ерөнхий сайд болох лөөлөө болж, засагт нь багтчих гэж тэлчигнэлдэж буй намчдын мөрөөдөл хад мөргөнө.

Хүүкийн үгээр хөдлөөгүй л юм бол УИХ-аар Ерөнхий сайдыг томилох эсэх тухай асуудлыг хэлэлцэхдээ нууцаар санал хураачих…МАН-ын Бага хурал шүүмжээ ил хэлж, саналаа нууцаар хураая гэх уриан дор явсан. Яг адилхан…