МАН-ын Удирдах зөвлөлийн 32 гишүүн 100 хувийн саналаар Ерөнхийлөгчийн Тамгын газрын дарга Г.Занданшатарыг Монгол Улсын 33 дахь Ерөнхий сайдаар нэр дэвшүүлэхийг дэмжсэн байна. Харин Бага хурлын заалнаас УИХ-ын гишүүн Г.Тэмүүлэнг нэр дэвшүүлэхээр тохиролцсон сураг байна  Гэхдээ Бага хурлын гишүүд яг ямар Ерөнхий сайдтай болохыг хүсч байгаа талаар бас сонирхох нь зүйтэй байх. Нэр дэвшигчид Бага хурлын гишүүдийн хүсэн хүлээж буй шалгуурт тэнцэх болов уу.

У.Отгонбаяр: Шинээр сонгогдох Ерөнхий сайдын нуруунд хүнд ачаа ирнэ. Дэлхий нийтээр эдийн засаг хүнд байна, Монгол Улс ямар нөхцөлд байгааг та бүхэн мэдэж байгаа байх. Тиймээс энэ бүхнийг эвтэйхэн аваад явчих хүн л хэрэгтэй.

Ж.Батбаясгалан: Улс төрийн нөхцөл байдлаас шалтгаалан эдийн засаг хүнд байдалд орж байна

Ж.Бат-Эрдэнэ: Улс орны нөхцөл байдлыг бүхэлд нь томоор нь харах хүнийг Ерөнхий сайдаар томилох ёстой.

Б.Заяабал: Энэ цаг үед Монгол Улсыг авч явах чадвартай хүн хэн байна вэ, тэр хүнд л анхаарах байх гэсэн хүлээлттэй байна. МАН боловсон хүчин хамгийн сайнтай нам. Бид авдраа ухвал маш олон хүн бий. Ерөнхий сайд болох чадвартай хүн маш олон, тэдний нэг нь Г.Занданшатар яах аргагүй мөн.  

Б.Бат-Эрдэнэ: Г.Занданшатарыг би удам угсаагаар нь мэднэ, хөдөлмөрийн баатар хүний хүү. УИХ-д бид хамт ажилласан. Буруу булхай юмтай холбогдохгүй хүн.  Гэхдээ том албан тушаалд очсон хүмүүс аль өөрчлөгдөхийг тэр гэх вэ. Одоо сайхан ярьдаг хүн олон болжээ. Гэвч үг үйлдэл нь их зөрдөг. Үгийг нь биш үйлдлийг нь харж сонголтоо хийх ёстой.

П.Анужин: Бүх ард түмний эв нэгдлийг хангасан, намын гишүүд болон парламентад суудалтай намуудын итгэлийг хүлээсэн хүн байх ёстой.

Х.Бадамсүрэн: Аливаа албан тушаалд шалгуур байх ёстой, тэр шалгуур хангасан хүн л Ерөнхий сайд болох хэрэгтэй.

Ц.Сандаг-Очир: Ерөнхий сайд эхлээд нам дотроо дараа нь парламентад суудалтай намуудтай учраа ололцдог хүн байх ёстой. Тэгээд эдийн засгийн хүнд нөхцөлийг даваад гарах хэрэгтэй.

С.Анхбаяр: Женко гэдэг хүний нөлөөллөөс Ардын нам ч, Ардчилсан нам ч Монгол Улс салах хэрэгтэй. Тэгэхийн тулд Женкотой хамааралгүй Ардын намын лидерүүдээсээ нэгийг нь Ерөнхий сайдад нэр дэвшүүлэх байх. Нөгөөтэйгүүр нам дотор гишүүд хагарсан нь үнэн, түүнийгээ цэгцлэх ёстой. Дарга нар хоорондоо тохирох бус ард түмний дэмжлэг хүлээх хүнийг Ерөнхий сайдад нэр дэвшүүлэх ёстой.

Х.Ганхуяг: Улс төржилт эхэлснээс хойш Засгийн газрын бүх ажил зогсчихлоо. Нүүрсээ гаргах ёстой хүмүүс ажлаа хийхгүй байна. Станцын хэвийн үйл ажиллагааг хангах ёстой хүмүүс ажлаа өгчихсөн гэж ойлгож байна. Тиймээс бүх ажил зогсонги болсон тул өнөөдөр яаралтай шийдвэрээ гаргаж, Засгийн газрыг ажилд нь оруулах хэрэгтэй.

Ч.Хүрэлбаатар: 2016 оноос хойш анх удаа хүчтэй сөрөг хүчинтэй болж байна. Хүчтэй сөрөг хүчинтэй ажиллана гэдэг бол эрүүл процесс. Онцгой эв нэгдлийг хангаж ажиллах ёстой. Засгийн газар УИХ-аас бүрэлдэх нь зүйтэй.

С.Наранбаатар: Геологийн салбарыг олборлолтоос түрүүлж явуулах, энэ салбарын зовлон жаргалыг мэддэг, хөрөнгө оруулалт татах чадвартай хүн сайд болох ёстой. Мөн ард түмнийхээ амьдралыг  аль ч түвшинд ойлгодог байх ёстой. 

С.Мөнхчулуун: Өнөөгийн нөхцөл байдал амаргүй байна. Засаг төр тогтворгүй байлаа. Улс төрийн туршлагатай хүн байгаасай. Олон нам парламентад орсон энэ үед бусад намтай учраа олоод явчих хэмжээний хүн байгаасай.

 М.Энхцэцэг: Засгийн газрын гаргасан бодлого, төлөвлөгөөг хэрэгжүүлэхийн төлөө хичээдэг, эрч хүчтэй хүн байгаасай гэж хүсэж байна.