Шинээр эмхлэгдэх Засгийн газарт хамтарсан засагт ажиллаж байсан сайд нараас оруулахгүй байх шаардлагыг МАН-ынхан тавьсан гэх. Гэсэн ч 33 дахь Ерөнхий сайдад Г.Тэмүүлэнгийн эсрэг Н.Учралыг уяж сойж байгаа гэх сураг ажиг гарсаар байна. Олны үг ортой ч байж мэдэх. Гэхдээ МАН-д өрнөж буй ахмадүе, залуусын гэх тулаанд мань хүн урваж, ЗГХЭГ-ын дарга атлаа Л.Оюун-Эрдэнийн эсрэг кноп дарсан.  Л.Оюун-Эрдэнийн УИХ-ын чуулган дээр “…Зарим хүнийг сонгож сайд болгосондоо харамссан” гэсэн гоморхлынх нь эзэн нь Н.Учрал гэж намынхан нь улс төрийн хүрээнд яригдаж буй нь худлаа биш.

35-хан настайдаа Цахим хөгжил, харилцаа холбооны сайдаар томилогдож, яг хагас жилийн өмнө Засгийн газрын Хэрэг эрхлэх газрын дарга Н.Учрал уг нь Л.Оюун-Эрдэнийн эмхлэн байгуулсан хоёр дахь танхим болох хамтарсан Засгийн газарт гол хүн байсан. 2016 онд 29 настайдаа УИХ-ын гишүүн болсноос хойш гурав дахиа сонгогдсон мань эр Монголын парламентад цахим бодлогын байнгын хороо байгуулагдахад анхны даргаар нь ажиллаж байсан. Тэр утгаараа тус салбараар “занималдаж” мэргэшсэн гэж ч болно.

Гэвч тэр Хүүкийн хүн гэдгээ баталчихлаа. Залуу хүн хэдий ч замнал, туулсан нь зам мөрийг нь тэгшлээ болов уу гэх итгэл байсан ч “ах”-ынхаа үгэнд ороод багийнхаа уналтыг дэмжчихсэн нь улс төрийн хүрээнд урвагчид гэгддэг увайгүй хүмүүсийн жагсаалтад оруулж орхив. Сайдын суудалд хоёронтоо сууж, хамтарсан Засгийн газрын гал тогоог зохицуулж байсан УИХ-ын гишүүн Н.Учралын хувьд харамсаар хар толбо. Нэг л урвасан нэжгээд урваж л таарна.

Түүнээс гадна Н.Учралыг УИХ-ын гишүүн болсноос хойш хадам ээж Б.Отгонжаргал нь Нийслэлийн нийгмийн халамжийн газрын орлогч даргаар томилогдсон. Харин хадам ээж Б.Отгонжаргалынх нь төрсөн дүү Б.Отгонцэцэг нь Чингис хаан Олон улсын нисэх буудал дахь Хилийн мэргэжлийн хяналтын албаны даргаар томилогдсон мэдээлэл байна. Тэгэхээр мань Н:Учрал урвагч шарваачаар барахгүй төрийн албыг төрлийн алба болгогсдын нэг  болж таарч байгаа биз. 

У.СҮХЭЭ