Маргааш МАН-ын Бага хурал хуралдаж, Монгол Улсын 33 дахь Ерөнхий сайдыг тодруулна. Албан бусаар нэр дэвших нь тодорхой болсон дөрвөн эрхмийн нэг нь Ерөнхий сайд болох нь баараггүй. Тодруулбал Монгол Улсын 32 дахь Ерөнхий сайд Л.Оюун-Эрдэнийн фракцийн зүгээс зүтгүүлж буй УИХ-ын гишүүн Г.Тэмүүлэн. Тэрээр УИХ-д гурав дахиа сонгогдсон. Гэхдээ, сайд болж байгаагүй. Одоогоор Төсвийн байнгын хорооны даргаар ажилладаг.

АНУ-ын American university сургуулийг төгссөн, олон улсын харилцааны мэргэжилтэй тэрбээр 2016, 2020, 2024 онд ээлжит сонгуульд нэр дэвшин сонгогдсон нэгэн.  Хэдийгээр түүнийг харьцангуй буурьтай хаа хамаагүй хашгирч давхиад байдаггүй гэж тодорхойлох нь сонсогддог ч аавынхаа нөлөөгөөр амжилтад хүрсэн гэх тодотгол байнга дагалддаг. Шуудхан хэлэхэд, Монголын улс төр ялангуяа МАН-д Г.Тэмүүлэн гишүүн гэхээсээ түүний аав Ч.Ганзоригийн нөлөө их гэлцэх юм билээ. Оргүй ч үг биш  л байх.  2008 онд “Эрдэнэт” үйлдвэрийн ерөнхий захирлаар томилогдсон аав Ч.Ганзориг Ашигт малтмал газрын тосны газарт мэргэжилтэн хийж байсан хүүгээ хэлтсийн дарга болтол нь албан тушаал ахиулсан нь намтарт нь тэмдэглэгджээ.

Түүнчлэн Г.Тэмүүлэн гишүүн  2020 онд  885 сая төгрөгийн  үл хөдлөх хөрөнгөтэй байсан бол 2022 онд 2.4 тэрбум болж нэмэгджээ. Улмаар 580  сая төгрөгийн үнэтэй Lexus 570,  Mercedes Benz G 500  хөлөглөж, 523 сая төгрөгийн үнэлгээ бүхий мал аж ахуйтай болсон байна. Түүнчлэн "ТТЕМ" ХХК,  "Евроконстракшн" ХХК-д хувьцаа эзэмшдэг гэж хөрөнгө орлогынх нь мэдүүлэгт бичжээ.

Мөн ЖДҮ санг аалзны тор мэт хэрсэн тухай баримт ил болох үед Г.Тэмүүлэн гишүүний ээжийнх нь эзэмшлийн “Спа цогцолбор” компани 2017 онд тус сангаас 700 сая зээл авсан нь ил болсон.  Зээлээ зарцуулсан зарцуулалт нь тодорхойггүй байдаг ч төлсөн гэх ангилалд орсон байна билээ.

Басхүү аав Ч.Ганзориг нь “Эрдэнэт үйлдвэр”-ийн удирдаж байх үед Ш.Батхүү гадны банканд улсынхаа ганц саалийн үнээг тавьж, 108 сая ам.долларын зээл авсан явдал. Ерөнхий сайд С.Баярын амаар өгсөн чиглэлийн дагуу ТӨХ-ны дарга асан Д.Сугар, “Эрдэнэт үйлдвэр”-ийн захирал асан Ч.Ганзориг нар үйлдвэрээ барьцаалуулахыг зөвшөөрч гарын үсэг зурсан гэх сураг байдаг. Гэхдээ шүүх дээр батлагдахгүй явсаар Д.Сугар, Ч.Ганзориг нар хэргээс чимээгүй сугарсан. Гэвч хэргээс үүдэж “Эрдэнэт үйлдвэр” Эрсдлийн сангаасаа 40 сая ам.доллар гаргаж, шүүхийн зардалд 37 тэрбумыг зарцуулсан. Угтаа удирдлагын буруутай үйлдлээс улбаалж, “Эрдэнэт үйлдвэр”-ээс асар их зарлага гарч, 10 жил шахам шүүх дээр маргасан  нь бодит үнэн. 

У.СҮХЭЭ