“Хүйтэн”-ий тулалдааны үеэр Чингис хаан хүзүүндээ шарх авч, тэднийг буулган авсны дараа олны өмнө ихэд тойруу замаар “Миний байлдааны ам цагаан хул морины аман хүзүүг хэн харвасан бэ” гэхэд Зэв жанжин “Би” хэмээн жагсаалаас гарч байгааг эх сурвалжид тэмдэглэсэн нь бий. Энэ чинь л ардчилал шүү дээ. Харин энэ цагийн ардчилсан Монгол Улсад ардчиллаас ангид асуудал арай л их гарах боллоо.

"Орлогоо нотол" гэх шаардлага хамтарсан Засгийн газрыг нурааж, одоо шинэ Ерөнхий сайдын эрэлд парламентад хамгийн олон суудалтай улс төрийн хүчин болох МАН-ынхныг бужигнуулж байна. Бүлэглэлүүдийнхээ бүрэн эрхийг хангах боломж үгүй тул өөр хоорондоо толхилцож, хэн нь хүчтэйгээ харуулах хэрүүл, тэмцэл намын байрнаасаа гадагшилж, долоон буудлын Должин эмээгийн хэрэг болтлоо задгайрав.  Гэвч төрт улсын ёсоор түмэн асуудлаа цэгцэлж, түйвээнт маргаанаа таслахаас өөр зам нэгэнт үгүй. Тэр ч утгаараа МАН-ын Удирах зөвлөл хуралдаж, Бага хурлаа товлов. Маргаашийн цаадтай манай МАН-ынхан шинэ Ерөнхий сайдаа тодруулна. Одоогоор олж сонссон ажиг сургаа тоймлон хүргэе.

Албан бус эх сурвалжаас авсан мэдээллээр бол өнөөдрийн байдлаар Г.Занданшатар, Н.Учрал, Ж.Энхбаяр, Г.Тэмүүлэн нарын нэрс яригдаж байна. Г.Тэмүүлэнг огцорсон Ерөнхий сайд Л.Оюун-Эрдэнэ зүтгүүлж байгаа бөгөөд Н.Учрал урдаас нь тосож өрсөлдөх тактик боловсруулжээ. Өнөө, маргаашдаа өөд өөдөөсөө үзэлцсэн эдгээр дөрвөн горилогч даваа гарагт хуралдах бага хурлаас дэмжлэг авахаар дор бүрнээ завгүй гүйж яваа. 

Ж.Энхбаярын тухайд манай улсын нэгдүгээр хүн болох У.Хүрэлсүхийн  бие төлөөлөгч гээд ойлгочиход болно.  Уг нь Г.Занданшатарыг элдэв шунал багатай, харьцангуй ном эрдэмтэй, ажилдаа махруу, попроод байдаггүй, ар талд зогсох найдвартай нэгэн гэж санадаг байсан юм. Гэтэл манай хүн танай хүн болчихсон уу гэдэгчлэн “цоохортож” орхисон гэх таагүй таамаг байна. Цоохортсон Зандка өөрийн сонирхол гэхээсээ илүүтэй  “Гэрэгэ тауэр”-ийн 15 давхарынхны хүсэлтээр Ерөнхий сайдыг тодруулах наадамд оролцохоор бэлтгэлээ базаасан гэж дуулдана лээ. Тэр ч бүү хэл “хэвлэлийнх” гэдэг хэдэн учраа мэдэхгүй микрофон баригчдаар пи араа хийлгэхээр мөнгө төгрөг тараасан гэх. Магадлал нь өндөр л дөө. Мань  Г.Занданшатарыг магтсан пост өчигдрөөс эхлээд цахим орчинд халгиа цалгиатайгаар давалгаалж байгаагаас харахад.

Үнэндээ Ерөнхий сайдад горилогч нэр бүхий дөрвөн хүмүүний хэн нь ч төр засгийн өндөрлөгт оччихоор, түмэн олны мөрөөдөөд байгаа шиг нэр цэвэр биш. Нийтлэг төрх л дөө манай улстөрчдийн. Хэрээ, хэрээнийхээ харыг гайхаж нэг шуугилдаад, мөнгөө төлсөн хүн нь дуртай дуугаа захиалж, дуулсан дуундаа өөрөө уярч нэг попроод Ерөнхий сайдын сунгаа иргэдийг залхаам удаан үргэлжилж байна. Эцсийн байдлаар нэр нь дурдагдаж, өөрсдийгөө Ерөнхий сайд болчихно хэмээн горьдлого тээн, бүх хүчээ шавхан байгаа дөрвөн горилогчийн бузрыг ухвал далай. 

ҮРГЭЛЖЛЭЛ БИЙ...