МАН-ын гишүүд дэмжигчдийн "Ардын хүч" холбооноос намын удирдлагууддаа шаардлага хүргүүллээ. Уг шаардлагад “МАН-ын Бага хурлаас гарсан шийдвэр хэрэгжихгүй хоёр долоо хоног болж байна. Хэдийгээр Засгийн газарт УИХ-аас итгэл үзүүлэхгүй гэдэг шийдвэрийг гаргасан ч шинээр байгуулах Засгийн газар товхинож чадахгүй олон хонож байгаа нь ард иргэд, намын гишүүдийн итгэл, урмыг хугалах, эргэлзэх ийм нөхцөлд хүргэж байна.

Тиймээс нэгдүгээрт, намын Бага хурлын товыг яаралтай зарлаж, Засгийн газрыг өдөр тутмын ажилд оруул.

Хоёрдугаарт, Засгийн газрыг шинээр бүрдүүлэхдээ намын хүний нөөцөөс сонгон шалгаруулах журам байдаг. МАН дундаа танигдаагүй хүн удирдах албанд томилох тохиолдол сүүлийн жилүүдэд нэмэгдсэн. Тиймээс намын хүний нөөцийг сонгон шалгаруулах журмыг баримтал. Мөн шинэ Засгийн газар байгуулбал өмнө нь хийж хэрэгжүүлж байсан Баялгийн сан, мега төслүүдийг даруй үргэлжлүүлж дуусга.

Гуравдугаарт,  Ерөнхий сайдад итгэл үзүүлээгүйгээс нийгэм, эдийн засагт асар их хохирол учрах гэж байгаа мэтээр зохион байгуулалттай арга хэмжээ маргааш, нөгөөдрөөс зохион байгуулах гэж байгаад намын зүгээс дорвитой хариу өгч шийд” хэмээжээ.

Түүнчлэн манай нам 2024 оны УИХ-ын сонгуулийн үр дүнгээр Засгийн газрын эрхийг барих бүрэн боломжийг авсан учраас шийдвэр гаргах гол субъект нь мөн.  Сая болсон МАН-ын Бага хурлаас АН-ыг гэрээний үүргээ зөрчсөн тул хамтарсан Засгийн газраас гаргах ёстой гэж үзснээ хэрэгжүүлэх ёстой. АН нийгмийг бухимдуулах, эрх баригчдыг харлуулах ажил хийж байгаад харамсч байна" гэж онцолсон юм.