Та мэдэх үү. Миний мэдэхээр энх цагт эх орноосоо урвасан гэх зэмд унасан хүмүүст үүрүүлэх Эрүүгийн хуулийн чангахан ялыг үүрүүлдэг. Эргээд тэнсэн харгалзах, сайн хүмүүжсэн гээд хоног багасгах хөнгөлөлт байдаггүй. Шүүхийн шийдвэр хэд гэнэ, ёсчлон биелүүлж яс эдэлдэг, ялаа...  Яг ийм төрлийн хатуухан ялыг улстөрчдөд ногдуулдаг болох ёстой гэх адын бодол төрсөөр багагүй хугацаа өнгөрлөө.

Дайны цагт урвагчдад үхэх ял оноодог байсан бол энх цагт үзэл санаа, өргөсөн тангаргаасаа няцагсдад, үүдэн хоймрын зайнд үг хэлээ 360 хэмээр өөрчилж өнгө төрхөө хувиргагч хамелеон дүртүүдэд  яагаад ял зэм оноож болохгүй гэж...Хэдхэн хоногийн өмнө УИХ-аас итгэл хүлээлгэхгүй хэмээгдсэн ч угтаа урвагчдаас болж унасан Л.Оюун-Эрдэнийн гэх тодотголтой Засгийн газрын сайд нар бүгд давхар дээлтэй байсансан. Давхар дээлтэй, басхүү нэг намын угшилтай сайд нар нь Засгийн газраа унагах кнопыг эргэлзэх зүйлгүй дарчихсан. Хурдтай хөгжлийн замд хүсэл зориг, итгэл үзэл санаа нэгдэн гарчихаад тэр шүү ээ. Зам зуураас буцах дампуу нөхдийг засагтаа нэгтгэснээ өнөөх маань өчиггүй ухаарч, албаа өгсөн.

Шулуухан хэлэхэд,  Засгийн газрыг огцруулах кнопыг намынх нь, танхимынх нь дөрвөн сайдаас бусад нь дарчихсан. Худлаа юм биш, Хурдтай хөгжлөөс Засгийн газрын Хэрэг эрхлэх газрын дарга Н.Учрал, Гадаад харилцааны сайд Б.Батцэцэг, Сангийн сайд Б.Жавхлан, Гэр бүл, хөдөлмөр, нийгмийн хамгааллын сайд Л.Энх-Амгалан, Хүнс, хөдөө аж ахуй, хөнгөн үйлдвэрийн сайд Ж.Энхбаяр, Эрчим хүчний сайд Б.Чойжилсүрэн, Эрүүл мэндийн сайд Т.Мөнхсайхан нар “няцсан”.

Тэд эх орны хөгжил цэцэглэлтээс илүү эрх ашигтай урвагч, улстөрчид болохоо нотлов. Ташармд сануулахад, Ерөнхий сайд Л.Оюун-Эрдэнэ чуулганы танхимд “Өнөөдөр ордонд хүч мөхөсдөж байгаа ч олон нийтийн хүсэл эрмэлзлэл огт өөр байгааг би мэднэ. Үзэл санаа, үнэт зүйл хэзээ ч ялагддаггүй. Аалзны тор мэт сүлжилдсэн ашиг сонирхолын сүлжээ ард түмнийг дийлнэ гэж хэзээ ч байхгүй. Мөнх хөх тэнгэрийн дор ардчилсан парламентын засаглал мөнхөд орших болтугай" хэмээн хэлсэн. Энгийнчилбэл, өөрийнх багтаа шигшиж, итгэж авсан нөхөд нь нөхөрлөл, итгэлцэл байгаагүйг онцолсон.

Урвагчдад нэг л ял бий. Тэр нь үхэх ял. Гэлээ гээд өнөөдүүлээ өөдгүй гээд буудчихалтай биш.  Гагцхүү урвагч урвагчаараа дуусдаг болохыг, урвагч улстөрчийн үйл улс оронд ямархан хохиролтойг санан санан улс төрөөс ангид байлгах акц өрнүүлье. Магад нэр дурьдагдсан хамтарсан Засгийн газрын урвагчид барьцаалагдсан биз. Барьцаалагдсан урвагч өөрийн сэтгэл санааны хувирлаар биш, магадгүй гарах гарцгүй болсон аргагүй шалтгаанаар улс үндэстэндээ дайсагнадаг. Дайснуудаас салъя.