Засгийн газрын тэргүүн Л.Оюун-Эрдэнэд итгэл үзүүлэх эсэх тогтоол нууц санал хураалтаар өнгөлж, АН-ынхан урьж оруулчихаад хөөж гаргасанд нь гоморхож, санал өгөхгүй гэдгээ мэдэгдсэнээр уналаа. “Огцрох амархан” аж.

Эргэн сануулахад,  2024 оны УИХ-ын ээлжит сонгуулийн үр дүнд МАН  дангаараа Засгийн газраа байгуулах бүрэн боломжтой байсан ч мань эр хамтарсан Засгийн газар байгуулах саналыг парламентад суудалтай намуудад тавьснаар биеллээ олсон. Үр дүнд нь 20, 30 жил цаасан дээр бичиглэгдэхээс цаашгүй байсан төслүүд эхнээсээ хөдөлгөөнд орж, эдийн засаг сэргэх нь гэх итгэл найдвар иргэдэд төрж эхэлсэн нь маргашгүй үнэн.

Гэвч шалтгаан бус шалтгаар эхэлсэн жагсаал Сүхийн талбайд 20 шахам хонож, манай улсын нэгдүгээр хүний дарангуйллын талаарх хов жил Төрийн ордноос халин түмний дунд яригдах болсон нь оргүй зүйл биш болохыг өчигдөр манай улсын нэгдүгээр хүний хэлснээс тодхон харагдлаа. Орлогоо нотол жагсаал, огцор болтлоо хөөсөрч, орлого нотлох эсэх тухай асуудал ордонд тухлах Монгол Улсын Ерөнхийлөгчийн тааллаар, бүр тодруулбал олигархиудын хүслээр өрнөж буйг баталчихлаа.

Ийн хардахын учиг итгэл үзүүлэх эсэх тухай тогтоолын төсөлд санал авахдаа нууцалснаар нотлогдчихлоо. Угтаа Монгол Улсын Үндсэн хуулийн 44 дүгээр зүйлийн нэгд, Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал, УИХ гурав хоногийн дараа хэлэлцэж эхлэн арав хоногийн дотор УИХ-ын нийт гишүүний олонхийн саналаар шийдвэрлэнэ гэж заасан буй. Тэнд хаалттай санал хураана эс бөгөөс хаалттай хуралдана гэх агуулга бүхий нэг ч үг өгүүлбэр байхгүй. Байлгаж чадлаа.

Засгийн зам заяаг нам, эс бөгөөс Ерөнхийлөгч ч шийдэхгүй. Гагцхүү парламентын засаглалтай улс учраас УИХ л шийдэх бүрэн эрхтэй билээ. Шийдвэрийг УИХ-ын 126 гишүүн гаргах итгэл мөрөөдөл байсныг харлаа. Ганц нэгээрээ нэгдүгээр хүнд дуудагдан, өрөөгөөр нь ороод гарсан гишүүд хаалттай санал хуравал эсрэг кноп дарах эрсдэл нэмэгдэнэ гэдгийг улс төр судлаачдын анхааруулга биежчихлээ.

УИХ-ын дэгийн тухай хуульд “Хаалттай хэлэлцэхээр хуульд заасан болон төрийн нууцтай холбоотой асуудлыг хаалттай хуралдаанаар хэлэлцэнэ” гээд заачихсан нь зүгээр цаасан дээр бичигддэг, хэрэгждэггүй журам болохыг үзчихлээ.

Ер нь бол Ерөнхий сайдыг тонгорч унагах тоглоомын ард Ерөнхийлөгч байгаа гэх шуугиант үнэн байж. Манай улсын нэгдүгээр хүнд В.Путин “ах” шигээ Үндсэн хуульд нэмэлт, өөрчлөлт оруулж, Ерөнхийлөгчийн сонгуульд дахин өрсөлдөх эрх олж авах алс хэтийн бодол байгаа л байх. Хэдийгээр “Үндсэн хуульд нэмэлт, өөрчлөлт оруулахгүй” гэж байгаа ч ард түмнээс сонгогдсон Ерөнхийлөгч маань иргэд олон нийтийн хүсэл сонирхолд “дөрлөгдвөл” яах юм бэ. Түмнийхээ хүсэл, зорилгыг биелүүлж, Үндсэн хуульд гар хүрэхээс өөр гарц алга гэвэл яанам бэ. Ард түмний сонголтоор гэх үгний ард алаг хорвоог ч эргүүлчих хэмжээний арга заль байж байгаа нь илт харагдлаа, үнэн байж.

Эцэст нь тэмдэглэхэд Л.Оюун-Эрдэнэд итгэл үзүүлэх тухай асуудал гэхээсээ олигархиудын ялалт байлаа. Одоо Ухаа худаг MCS-д үлдэж, орд газрын үр шимийг  хүртэх олон түмний итгэл мөсөн уул мөргөнө. Дараагийн засаг эмхлэгдэхээр завсар зайгаар нь шургалчих гэсэн хоёрдугаар ээлжнийхэн хөнжил дотроо хөлөө жийлцэж, МАН дахь сөргөлдөөн улам бүр эрчээ авна. Басхүү хөөгдсөндөө тунирхан, санал өгөхөөс татгалзсан АН-ынхан сөрөг хүчний дүрд тоглох гэж хийсэн хэлсэн бүхнийх нь эсрэг кноп дарна. Уг нь АН-ын олонх гишүүд Засгийн тэргүүн асанд итгэл үзүүлнэ гэж байсан юмсан...  Яг юу болчихов оо?