Засгийн газрын тэргүүний хүүгийн сүйт бүсгүйн сүйн бөгжөөр шалтагласан шантааж газар авахгүй бололтой. Ирж цай уу гэж урьчихаад эргээд ааш нь хөдлөөд агсам тавиад хөөчихдөг тавьтаргүй нэгэн шиг занг МАН гаргалаа. МАН-ын Бага хурлын шийдвэр гэхээр МАН-ынх гээд хэлчихэд болох байх гэж бодож байсан юм. Тэгэхнээ байдал өөрөөр эргэж, мань Ерөнхий сайдын гар дахь хөзөр итгэл төрүүлэхүйц эвтэйхэн өнгөөөр туяарах нь илэрхий болчих шиг боллоо. Өөрөөр хэлбэл, огцрох өргөдлөө өгөх хүсэлт бус итгэл үзүүлэх эсэх тухай тогтоолын сонголт энэ цагийн улс төрийн өнгө төрхийг огт өөрөөр төсөөлж байсан зарим нэгэнд чангахан цохилт болох болов уу.

"Засгийн газарт итгэл үзүүлэх эсэх" тогтоолын төслийг сайд нарын 100 хувийн саналаар дэмжиж, УИХ-аар хэлэлцүүлэхээр болсон нь улс төрд даам гарахаар шийдчихсэн сууж байсан зарим нэгэнд зангаргийг нь мэдрүүллээ гэх гээд байна л даа. Эх сурвалжийн өгүүлснээр Бага хурлын үеэр намынхан нь АН-ыг хамтралаас гарга гэх шаардлага тавьсан агаад Ерөнхий сайд Л.Оюун-Эрдэнэ, "АН-тай хамтрахгүй гэвэл би ёс зүйн хувьд ажлаа өгөх ёстой" гэж мэдэгдсэн гэдэг.

Одоо сайд нарын 100 хувийн саналаар дэмжигдсэн "Хамтарсан Засгийн газарт илтгэл үзүүлэх эсэх" тогтоолыг УИХ хэлэлцэнэ. Мэдээж горимын дагуу УИХ-д хүргүүлсэн "ИТГЭЛ ХҮЛЭЭЛГЭХ"-ийг хүссэн тогтоолын хүрээнд УИХ, Үндсэн хуульд нийцэж буй эсэх цаашлаад холбогдох хууль тогтоомжтой зөрчилдөж байгаа эсэх асуудлаар ҮХЦ-д мэдээлэл гаргана.  ҮХЦ уг тогтоолыг хүлээн авч хянан үзээд ажлын гурван хоногийн дотор УИХ-д дүгнэлтээ гаргаж өгнө. Өөрөөр хэлбэл, ирэх долоо хоногт УИХ-ын Төрийн байгуулалтын байнгын хорооны хуралдаанаар ҮХЦ-ээс гаргасан дүгнэлтийг хэлэлцээд УИХ-аар уг тогтоолыг хэлэлцүүлэх эсэх шийдвэрийг гаргана гэсэн үг. Мэдээж Ерөнхий сайдад  итгэл хүлээлгэх асуудал нь Үндсэн хууль зөрчөөгүй гэж үзсэн тохиолдолд УИХ хүлээн авч хэлэлцэнэ. УИХ итгэл хүлээлгэх нь зөв гэх шийдэлд хүрнэ гэдгийг харин ч нэг Ванга шиг хэлчихье.

УИХ-аар Ерөнхий сайдад итгэл үзүүлэх эсэх тухай асуудал яригдах төсөлтэй дөрөө харшуулан, АН-ын найман сайд өргөдлөө өгч засгаас гарахаа мэдэгдсэн. УИХ-д 42 суудалтай АН засгаас гарсан ч Л.Оюун-Эрдэнэд итгэл үзүүлнэ.  Гэхдээ УИХ Засгийн газрын тэргүүнд итгэл үзүүлбэл, АН-ынхан засгаас гарах боломж байна уу. Хууль бол гууль гэсэн зарчмаар ажиллачихгүй бол Үндсэн хуультай харшилна. Өөрөөр хэлбэл Ерөнхий сайдад итгэл үзүүлсэн тохиолдолд АН-ын найман сайд ажлаа өгнө гэдэг боломжгүй асуудал. Хэрвээ нам дангаараа гарна гэвэл заавал ҮБХ-ыг хуралдуулж байж шийднэ. Тэр болтол хамтарсан Засгийн газарт сайдууд ажилласаар л байх болно… Хамтрал хууль эрхзүйн хүрээнд хагарч бутрахгүй гэсэн үг .