Л.Оюун-Эрдэнийн Засгийн газрыг унагах жагсаал Сүхийн талбайд 12 өдрөө үргэлжилж байна. Орлогоо нотол гэх шалтгаанаар эхэлсэн уг шалтгаан угтаа Ерөнхий сайдын хүүгийн тансаглалаар шалтгалж байгаа болохоос шалтгаалж байгаа юм биш. Шалтгаан нь аль эртээ эхэлчихсэн юм, МАН дотор. МАН доторх бүлэглэлүүдийн сөргөлдөөн Засгийн газрын хувь заяаг шийдэх тулааныг аль өвөл эхлүүлсэн. Өдгөө бүлэглэлүүдийн тулаан хяналтаас гарч засаглалаа өөрчлөх хэмжээнд хүрчихээд байна.

Өнөөгийн улс төрийг практик арга зүйн үүднээс БОДЛОГЫН, БҮЛЭГЛЭЛИЙН, ТЭМЦЛИЙН, ХӨЛСНИЙ улс төр хэмээн ангилдаг. Монголын улс төрийн практикын үнэн дүр төрх ийм. Бүлэглэлийн улс төр нь БОДЛОГЫН улс төрөө, ХӨЛСНИЙ улс төр нь ТЭМЦЛИЙН улс төрдөө дарангуйлагдан он жилүүдийг өнгөрөөж байна. Эдийн засаг, нийгмийн асуудлын шийдэлд баримжаалсан үзэл баримтлалд суурилсан улс төрийг БОДЛОГЫН улс төр гэдэг бол БҮЛЭГЛЭЛИЙН улс төр гэж санхүү, бизнесийн бүлэглэлүүд харьяаллын улстөрчдөөрөө дамжуулан эрх мэдлийн мэдлийн төлөө тэмцэлдэхийг хэлдэг. Харин тэмцлийн улс төр гэж парламентын гаднах сөрөг хүчнийг хэлдэг бол хөлсний улс төр гэдэг захиалгат акцийн гүйцэтгэгчид юм. Хөлсний улс төр ордон дотор ч , ордны гадна ч өрнөдөг гэдгийг бид мэдэх болсон.

Засгийн газрыг дэгээдэх санаархал цэрэг хүүгийн гэр бүл угаартан сүйрсэн талаарх мэдээлэл нийгэмд цацагдахтай зэрэгцэн УИХ-ын гишүүн Ч.Лодойсамбуу гишүүн Засгийн газрыг огцруулах саналыг УИХ-д оруулахад шаардагдах 32 гишүүний гарын үсэг цуглуулж эхэлснээр анзаарагдсан. Уг мэдэгдлийн утга нь утаа, угаарын асуудлаар тулгуур хийсэн ч цаг хугацааны хувьд далд цаанаа өөр асуудалтай холбогдож байсныг судлаачид сануулж л байсан.

Шуудхан хэлэхэд, Ухаа худаг, цагаан суварга тэргүүтэй стратегийн ордуудыг эзэмшигч МСS, МАК зэрэг компаниуд өдгөө засгийн эрхээс шахагдан гарсан МАН-ын ахмад үеийг санхүүжүүлж ирсэн байдаг. Харин Л.Оюун-Эрдэнэ, Л.Амарбаясгалан нарын тэргүүлсэн залуу МАН энэ санхүүжилтээс татгалзсан нь  үнэн. Араас нь Хууль зүйн сайд асан УИХ-ын гишүүн Б.Энхбаяр эрчтэйгээр орж ирсэн нь бас үнэн. Мань эрд бага сага хэмжээний ашиг сонирхол бий нь мэдээж. Ийн хардахын учиг хамтарсан Засгийн газар байгуулагдах үеэс л улбаатай.

Ийнхүү Монгол төрийн эрх мэдэлд үе шилжилт буюу генерацын үйл явц засгаас шахагдсан ахмад МАН-ын санхүүжүүлэгч бүлэглэл, залуу МАН-ын бүлэглэлийн хоорондох хурцадсан сөргөлдөөнөөр үргэлж байтал дундуур нь Ерөнхийлөгчийн бүлэглэл ороод ирлээ. Олон улсын улс төрийн шинжээчид ч “Ерөнхий сайдын хүүгийн амьдралын хэв маягийг Монгол Улсын Ерөнхийлөгч У. Хүрэлсүхийг дэмжигчид түүнд УИХ-ыг огцруулж, хоёр дахь удаагаа бүрэн эрхээ хэрэгжүүлэх эрх мэдэл олгох зорилгоор ашиглаж байна  / The Guardian/ гэж таамаглаж байна.

Эцэст нь тэмдэглэхэд энэ удаагийн Засгийн газрыг авч үлдэх, аль эсвэл унагах эрх УИХ-д бий. УИХ Засгийн газраа авч үлдэх үү эс бөгөөс засаглалаа өөрчлөх шоглоомд түүхийн амьд гэрч болох эсэхийг энэ долоо хоногт  шийднэ.

З.Урсгал